KHAWTHLIR

Lirthei tlân dan
March 1-3, 2019 chhung­in Tuikual North Kohhran biak-inah KṬP Rorel Inkhawm neih a nih dawn avangin Traffic SP Rodingliana Chawngthu chuan Tennis Court leh Dinthar kâwn inkara lirthei tlan dan tur a tidanglam. March 2-3 chhungin zing dar 7:30-10:00 inkar leh tlai dar 4:00-7:00 inkarah Dinthar kâwn aṭangin Tennis Court lam panin Kaisara Road-ah lirthei tlân phal a ni dawn lo. Thupek hian chhiatrupna thil, kângmei leh rîkrum kaih­hnawiha duty leh dan leh thupek pawimawh bika duty-te chetvelna a huam lo thung.

Thisen pe
DIET, Siaha chuan nimin khan Saiha District Hospital tan thisen unity 15 an pe a, a petute mipa 10 leh hmeichhia panga an ni.

Tawrhpuina thu
Congress party ṭhalaite leh PRISM party chuan thuchhuah siamin, Feb­ruary 27, Nilainia Home minister Lalchamliana chhim lam zin zuitu lir­thei che­suala mi pathum an thi chu pawi an tih thu leh mitthi chhungte Pathianin thlamuan se an duh thu an tarlang a; hliam mi pahnihte pawh dam ṭha leh thuai tura an duhsak thu an sawi bawk.

Power supply Ti tha turin ngen
Mizo Zirlai Pawl (MZP) chuan thuchhuah siamin, HSLC exam ṭan a ni a, HSSLC exam pawh ṭan a nih mai dawn avangin, zirlaite'n ṭha leh tluang taka lehkha an zira exam an hmachhawn theih nan power supply hnianghnâr zawk pe turin Mizoram sorkar an ngen. MZP chuan, zirlaite lehkha zir tibahlah thei zawnga bengchheng leh harsatna siam lo turin mi tin an ngen a; zirlaite pawh ṭhahnemngai leh taima taka lehkha zir turin an chah a ni. 

Heroin man
Central YMA hnuaia SRS duty-te chuan nimin zing khan Rosangpuii (38) d/o Lalthangliana (L), Champhai Bethel Veng nia inchhál leh Lalparmawii (32) d/o Lalsanga (L), Champhai Venglai nia inchhalte hnen aṭangin heroin no. 4 hawng nga an man. Ruihhlo an nei hi Rs. 1,75,000 man a ni a, a neitua puhte nen Excise & Narcotics department hnenah an hlan. SRS hian nikum December 20 aṭanga nimin thleng khan heroin hawng 126, can 1,100, chhin sen 110 leh Bagha cap 591, Ganja kg. 2 leh Meth mûm 1,00,000 an man a ni.