Hmasawnna hnathawh thlirho

Siaha District Development Coordination and Monitoring Committee leh Lawngtlai District Development Coordination and Monitoring Committee (DISHA)-te chu Nilaini leh nimin khan an ṭhu a, sorkar laipui scheme hnuaia hmasawnna hnathawh hrang hrang an thlirho. Meeting hi chairman CL Ruala, Lok Sabha MP leh co-chairman Ronald Sapa Tlau, Rajya Sabha MP ten an ho a ni.

Nilainia Siaha DISHA meeting, District Rural Resource Centre-a neiha tarlan danin, sorkar kum kal mekah Siaha DRDA-in Siaha district-a MGNREGS hnuaia job card nei mi 14,947-te tan 2018-19 chhungin inhlawhna ni 78 an siam tawh a; IWMP hnuaiah sum nuai 275.802 dawngin, cheng nuai 244.222 hman a ni tawh.

PMAY(G) hnuaiah chenna in 117 sak zawh a ni tawh a, BADP (2017-18) fund aṭangin hna chi hrang hrang 20 thawh a ni a, 12 zawh tawh niin, pariat la kalpui mek a ni.

Old age pension mi 1,019 hnenah thla tin Rs. 250 pe mek a ni a, kum 80 chung lam mi 231 hnenah thla tin Rs. 550, hmeithai 166 hnenah thla tin Rs. 350 leh rualbanlo mi 45 hnenah thla tin Rs. 350 pek mek a ni bawk.

Deen Upadhyaya Gram Joyti Jojana (DDUGJY) hnuaia IMVA 33/11KV Sub-Station, Phûra khuaa siam mek tih lohah chuan hna zawng zawng thawh zawh a ni tawh a; SAUBHAGYA hnuaia BPL chhungkuate hnena connection pek tur pawh pek zawh vek tawh niin, hna dang pawh March 2019 ral hmaa zawh hman beisei a ni.

Nimina Lawngtlai DISHA meeting, DC conference hall-a neiha an tarlan danin, sorkar kum kal mekah Lawngtlai district-ah MGNREGS hnuaiah job card nei mi 30,983 an awm a, ni 83 inhlawhna siam tawh niin, ni 92 tlin theih an beisei.

Pradhan Mantri Awaas Yojana-Gramin (PMAY-G) hnuaiah kum 2016-17 chhung atana target beneficiary 912 aṭangin beneficiary 883 chu in sakna tur second instalment pek zawh tawh a ni.