Zokhawthar VTF leh AR sipai an inngur AR thu zâwm loin VTF an duty zui zel
Zokhawthar village task force (VTF)-te chu Mizoram leh Myanmar ramri kân an awm loh nan ramri kânna hrang hrangah an duty ṭhin a, chutih laiin, tun hnai khan an khuaa Assam Rifl es hotupain ramri-ah duty ve tawh lo tura a tih avang leh mipui rîkrâp zawnga khawsaa an ngaih avangin an lungawi loh thu April 3, Zirtawpni khan Chief Secretary-ah an thlen. Zokhawthar VTF-te an duty chhunzawm zel.
Chief Secretary hnena lehkha an peka an ziah danin, Zokhawthar leh Khawmawi (Myanmar) inrina Ṭiau luia duh duha inkalpawh theihna hmun km. 1 zeta thui a awm a, chumi veng chuan VTF-te hmun 15-ah an duty ṭhin. Ramri kana inkalpawh turte an dang ṭha a, an tlaivar loh zeuh zanin zanlai pelhah pawh lut ru an awm hman a; lut rute chu police nen ṭanghoin quarantine centre-ah an dah vek a ni.
Zokhawthar kaltlangin Mizo ramah Covid-19 a lut ang tih hlaua ṭhahnemngai taka an duty laiin AR hotupa Maj. Sunny chuan Ṭiau lui dungah tualchhung mite chu duty ve tawh lo turin hmaichhanah a hrilh tih an tarlang a, "AR hotupa hian hel ram ang maiin khaw chhunga a sipaite silai kâp mai thei tura lektirin, mipui tirálṭi zawngin a khawsa fo a ni," an ti. Covid-19 a luh loh nan ṭhahnemngai taka an duty laia AR hotupain duty ve tawh lo tura a ti chu hriatthiam harsa an tih thu sawiin, "Min khap ngawt hi kan lungawi lo tak zet a ni," an ti a; AR duty ringawt chu Covid-19 laka himna tlinga an ngaih loh avang leh mipui him zawk nan an duty zel tur thu an tarlang.
April 2 tlaia Zokhawthar VTF leh YMA hruaitute ṭhukhawm chuan, VTF anga Ṭiau lui dungah uar zawka duty chhunzawm an rél a, 'Duty tur reng rengin chempui leh tiang ṭha tak thawh chhuahpui vek tur a ni,' tiin thutlukna an siam. Hripui laka Zokhawthar a him theih nana an hmalakna leh an duty tibuai zawnga chete chu a tawp thlenga do an tum thu an puang.
Chief Secretary hnenah, "Hetiang hi kan dinhmun a nih avangin, harsatna eng pawh tawk ila, kan nunna venhima a awm reng theihna tura kan hmalakna a ni tih min hriatpui tur leh a ṭul apiang min bawhzuisak turin i thuneihna kan ngen a ni," an ti. Zokhawthar VTF hruaitute hnen aṭanga thu dawn danin, Ṭiau lui dungah an duty chhunzawm zel a, Assam Rifles lamin an hotupa thu chhuak chu an bawhzui loh avangin AR nen an inkarah harsatna a thleng zui rih lo. VTF duty-te hi nimin khan Champhai aṭangin magistrate Lalnunkimi'n a tlawh niin an sawi.
Zokhawthar VTF hruaitute chuan, Ṭiau luia an duty postte chu an thuam ṭha tih sawiin, "Bűktę kan sa a, a ṭhenah silpauline kan zar a, a ṭhenah rangvate kan chih bawk. Sipai ho hian duty post pahnih chiah an nei a, an veng hneh lo nasa. VTF-te kan duty loh chuan kan him zo dawn loin kan hria," an ti