Chapchar Kût hlim taka hman a ni Lammual hi Mizoram sorkar ta a ni dawn - CM

Mizo kût ropui ber Chapchar Kût chu nimin khan Mizoram hmun hrang hrangah hlim taka hman a ni. A hmanna pui ber Aizawla Lammualah chuan kût pa Zoramthanga, chief minister hoa hman a ni a; Chief Minister chuan, Lammual chu kumin June thlaah chuan Mizoram sorkar ta a ni tawh dawn tih a sawi.

CM Zoramthanga chuan, tunah chuan sipai hmun hawhin Lammualah Chapchar Kût hman a nih thu a sawi a, "June 2019 aṭang chuan Lammual hi Mizoram sorkar ta a ni tawh dawn. Ka suangtuah dan chuan, Assam Rifles hmunah hian ruahsûr leh ni sáin a tihbuai theih lo turin a chung nei, mi sing bî kan len theihna tur siam kan tum," a ti.

Mizoram chu Pathianin ram ruaka a dah, pi leh pute'n an dah a nih thu sawiin CM Zorama chuan, "Kum 50 vel kan nih hnuah missionary lo kalin, zaa za ringtu kan ni thut thei ang hi khawvel hmun dangah a vâng em em a ni. Chumi hnuah Pathianin hnam thinlung min zirtir a duh a, rambuaiah kan awm a ni," a ti a; tunah chuan Mizoram chu ram rálmuang ber a nih tawh thu a sawi.

Zoramthanga chuan, Chapchar Kût chu Zo hnahthlakte inpumkhatna atana hman ni se a dun thu sawiin, "Ram dang leh state danga kan unaute nen kan inzawmna leh inpumkhatna a ngheh zual zel theih nan bul i ṭan thar ang u," a ti.

Chief Minister chuan, mipui let 3/4 châwm zo thei Mizoramah ram a awm thu sawiin, "Ram ṭha tak kan nei hman ṭangkai hi ṭhalaite tan chona a ni. India ram per capita sang ber ni turin ṭan i la ṭheuh ang u," a ti a; Mizoramin malsawmna a dawnte a ṭangkai thei ang bera hmang a, ram hausakna hai chhuah kawngah theihtawp chhuahpuiah mipuite a sáwm a ni.

Kût thlengtu R Lalzirliana, Art & Culture minister chuan, Chapchar Kût hman a nih rualin pi leh pute nun mawi, an tlawmngaihna leh diknate chhar thar leh turin mipuite a chah a, "Pipute hun lai khan an huaisenna kha a hun takah tilangin, an khua leh tui humhim nan mi ngam loh neih an duh ngai lo. Tunlai khawvel ráldo awm tawh lohnaah chuan kan hmanraw pawimawh ber chu kan thiamna hi a ni," a ti.

Chapchar Kûtah hian khawvel hriata Mizote chawimawitua ngaih mi pathum - footballer Jeje Lalpeklhlua te, khawvela tlang sang ber Mount Everest láwn chhuah pahnih David Zohmangaiha leh Lalrintluangi te hnenah Kût Pain Chawimawi Nopui a hlan.

Lammuala Chapchar Kût hmannaah hian Mizo nun zia chi hrang hrang tarlan a ni a, zaithiamte an zai bakah, hnam lâm hrang hrang entir a ni. India hmarchhak state tin aṭangin cultural troupe ten an hnam lâm an entir a; Kût pual hian Lammualah Zo thuam hrang hrang zawrh a nih bakah, Food Court buatsaih a ni bawk.

Chapchar Kût lawmnaah hian hmun hrang hranga Zo hnahthlakte sawm zingah Falam, Tidim, Halflong, Tahan, Shillong, Manipur leh Bangladesh aṭangin aiawh an rawn intir thei a ni.