Kolasib damdawi-inah OPD online registration tih theih

Nimin aṭang khan Kolasib District Hospital-ah Out Patient Department (OPD)-a inentir duhte tan online registration tih theih a ni a; Mizoram damdawi-ina online-a OPD registration tih theihna hmasa ber a ni.

OPD card lakna atana on­line registration hman a nih chhan sawifiahin medical supe­rintendent Dr James RE Mawia chuan, "OPD-a inentir tur dam­lote rei tak tak card la tura an intlar ṭhin a bo theihna atan a ni," a ti a; online hmanga OPD card la duhte chuan mobile phone emaw, computer emaw hmangin www.zohms.org ah luh a, enrolment tih tur a nih thu a sawi.

Dr James RE Mawia chuan, online registration tite hian vawi khat bak registration an tih a ngaih loh sawiin, "Registration tih hunah enroll number print theihin a awm ang a, chumi hmang chuan OPD-a inentir dawn apiangin registration an tih tawhna www.zohms.org-ah phone emaw, computer hmangin emaw online-a luh leh mai tur a ni a, enrolment number chu hman zui zel theih a ni," a ti.

Medical Superintendent sawi danin, online registration tite'n mahni in aṭang pawhin inentir an duh ní-ah an enrolment number hmangin OPD card an hauh ang a, card la tura intlar ngai loin, OPD hawn hunah an hming an lam hun an lo châng dawn a ni.