Referral Hospital-a CT Scan dah a nih aṭanga thla rukah a la hman theih loh
State Referral Hospital (SRH), Falkawna hman tur CT Scan khawl, July, 2018-a dah tawh chu nimin thleng khan hman theih a la ni lo.
Directorate of Hospital & Medical Education (DHME)-a engineer pakhat chuan CT Scan hman theih a nih loh chhan chu a dahna tur pindan chungah tui a luh theih vang a nih thu Vanglaini-a hrilh a, "Room hi siam mek a ni," a ti. Hetih lai hian, SRH hotute leh MIMER lama thawktute chuan CT Scan chu directorate aṭangin an dawng tih bâk a enkawl zui zel dan tur ruahmanna an hriat thui loh thu an sawi.
Vanglaini palaiin State Referral Hospital a tlawh lai chuan CT Scan khawl hi a dahna tur pindan kawtah a la awm a, engtikah nge hman theiha dah luh a nih dawn an hre thei lo niin thawktute chuan an sawi.
DHME-a engineer pakhat chuan, CT Scan awmna tur satu contractor-in civil work lam a zo thawkhat tawh niin a sawi a, "Hmanraw ṭhenkhat chu chah chawp ngai niin an sawi a, hei vang hian harsatna a awm a ni. Chung lam aṭanga tui chhe paihna leh toilet aṭanga tui pût leh hnáwng ṭhin vangin harsatna kan tâwk a ni," a ti.
State Referral Hospital-a thuneitute, MIMER-a thuneitute leh doctor ṭhenkhat chuan CT Scan chu directorate lam aṭanga an dawn a nih thu sawiin, chu bâk chu hriat an nei thui lo tih tih an sawi a; CT Scan leh MRI supply order pawh an dil tawh thu leh tun thlenga an la hmuh ve loh thu an sawi bawk.