Mizoram independence puannaa Hming ziaktute chawimawi an ni

MZP General Head­quarters chuan nimin khan an pisa conference hall-ah MNF-in kum 1966-a Mizoram zalenna (inde­pendence) an puannaa hming ziaktu (signatory)-te chawimawina hun an buat­saih a; mi pariat hnenah chawi­mwina thuziak an hlan.

Chawimawina inkhawm hi MZP vice president B Vanlaltána'n a kaihruai a, president L Ramdinliana Renthlei-in thu a sawi. L Ramdinliana chuan, Mizo hnamin mahnia ro inrêlna neih hran a duh nia sawiin, "India sorkar awpna aṭanga inlâk hran leh duha zalenna sual a nih leh theih nana hming ziaktute kan ngaihlu a, kan chhuang tak zet a ni," a ti.

MZP President sawi danin, Mizote chu pi leh pute aṭangin mahnia ro inrêla awm ṭhin, khawi ram mahin min awpbeh ngai loh a ni a, mahse, kum 1890 aṭangin British-in a awp ṭan a ni. Kum 1946 chhoah British sorkar chu a keh darh a, India-in a awp ve ta thung a, tun thlengin Mizote chu India sorkar hnuaiah an awm ta a ni.

L Ramdinliana Renthlei chuan, Mizoram tana zalenna sualtute'n mahnia ro inrêlna neih duhna thinlung an pu chu MZP-in a chhuan thu sawiin, "Zalenna an sual tak tak a ni. Mizoramin zalenna a sualna chhan hi kawhmawh bâwl vang emaw, sual vang hrim hrim a ni lo a, min awmbettute aṭanga zalenna tluantling neih duhna vanga a ni," a ti a; rambuai laia Mizoram tawrhnate chu mi ṭhenkhatin sawi nêp tum mah se, sawi nêp theih a ni lo a, a nêp thei lo tih a sawi.

MNF-in Mizoram independence an puannaa hming ziaktu MZP-in an chawimawite chu - C Lalkhaw­liana, Chanmari, Aizawl; H Thangkima, Upper Republic; R Zamawia, Tuivamit; Bualhranga (senator), Dawrpui; Dr Saikunga Sailo, Chanmari; Zoramthanga, Chhinga Veng; Khawlremthanga, Zohmun leh V Lalchhawna, Siaha-te an ni.