KHAWTHLIR

KTP Rorel
Kristian Ṭhalai Pawl (KṬP) chuan nizan aṭang khan Tuikual North Kohhran biak-inah Rorel Inkhawm vawi 8-na an hmang ṭan. KṬP Rorel Inkhawmah hian nizan khan palai lawm leh report inkhawm neih a ni a, kum 2019-20 atana kumpuan hawnna leh hlanna hun hman a ni. Vawiinah nilengin Central KṬP leader Rev.Dr K Lallawmzuala kaih­hruaiin rorel a ni ang a, Pathianni zanah a ṭiak ang.

MLA-in hmanpui
February 28, 2019-a Tuipuiral Group YMA inkhawmpui, Vangchhia community hall-a neih chu bialtu MLA Ramthanmawia'n a hmanpui a; chawhnu lamah branch hrang hrangte'n hnam lâm an entir. Ramthanmawia chuan, YMA chu Mizo mipui innghahna a nih thu sawiin, ram leh hnam humhalhna kawng hrang hrang - thing leh mau, ramsa sava leh tuihna humhalhah te, ruihhlo leh sual do kawngahte rilru fîm tak hmanga kawng ṭha dap chung zelin hma la se a duh thu a sawi.

Dil theih
Mizoram State Sports Council chuan February 28, 2019 khan circular tichhuakin, 46 Assam Rifles aṭanga lehkha an dawn angin general duty category atan mi 116 chu sports quota aṭanga lak a nih dawn thu a tarlang a, "Online hmangin March 17, 2019 hmaa dil theih a ni a, online application ti duh tan battalion hqrs.-ah cell din a ni," an ti.

Delhi-ah Kut
Nimin khan New Delhi-a Mizote chuan nimin Mizoram House, Vasant Vihar-ah Chapchar Kut an hmang a; Lalchhuangliana, IAS (Rtd.) Kut Pa a ni a, addl. resident commissioner David Lalthantluanga chu Kut Thlengtu a ni. Chapchar Kut lawmnaah hian mi 150 vel telin, tlaiah kût ruai an ṭheh nghal a ni.

Ran chiu
Serchhipa AH&Vety department chuan February thla chhung khan an district-a khaw hrang hrangah ran hri laka venna atan vawk, láwi leh sialte hri dannain an chiu. Vawk pûl hri danna SF Vaccine-in vawk 2,369 an chiu tawh a; Foot and Mouth Disease vaccine-in bawng leh sial 209 an chiu tawh. Kum 2013, 2017 leh 2018-a PRRS hrilêng vangin Mizoram pumah vawk 11,079 an thi a, hei vang hian AH&Vety chuan vawk pûl hri dannaa ram chhung vawk zawng zawng chiu vek tumin hma an la a, ran chiu man erawh an la lo a ni.