Mizoram pumah Chapchar Kût hman a ni

Nimin khan Mizoram hmun hrang hrangah Chapchar Kût hman a ni a, hnam lâm leh zai chi hrang hrang entir niin, khaw ṭhenkhatah chuan minister leh MLA-te pawh an tel. Kut thupui chu ‘Zo fate inpumkhatna’ tih a ni.

Khaw ṭhenkhat chu sorkarin sum a pek hmanga Chapchar Kût hmang an nih laiin, sorkar aṭanga sum dawng ve lo, khawtlang ṭhahnemngaihnaa hmang an awm nual bawk.

District headquarters-ah
Lungleiah chuan Ṭhuamluaia Mualah hman a ni a, YMA sub-headquarters president Lalrotluanga kut thlengtu niin, minister C Lalrinsanga chu C Lalrinsanga chu kût pa a ni. Minister C Lalrinsanga chuan, Kût hmangtu zawng zawngte duhsakna hlanin, thupui - Zo fate inpumkhatna tih chu vawng nung reng turin mipui a chah.

Lungleia Chapchar Kûtah hian hnam lam chi hrang hrang entir a nih bakah, zaipawl leh mimalte an zai a, Gurkha Youth Association-te pawh chanvo pek an ni a; Chapchar Kût Miss leh Hraitê thlan a ni bawk.

Siaha khawpuiah pawh Siaha Vaihpi-a District Playground-ah Chapchar Kut hlim taka hman a ni a, mipui ṭhahnem tak an tel. Lawngtlaiah chuan DC pisa tualah hman a ni a, Lawngtlai East bial­tu MLA H Biakzauva chu kût pa niin, Lawngtlai additional DC Dr Andrew H Vanlaldika chu kût thlengtu a ni. Hnam lam leh zai chi hrang hrang entir a nih bakah, Association for Voluntary Blood Donation (AVBD), Lawngtlai Branch-in thisen pek uar inzirtirna hun ann hmang a; Chapchar Kût Miss atan Jasmine VL Hruaii, Lawngtlai Vengpui-II an thlang.

Champhaiah chuan Kahrawt Field-ah Kut hman a ni a, minister of stgate TJ Lalnuntluanga kût pa a ni. Minister chuan, hnam zahawm leh ropui ni tur chuan intodelh a ngai tih sawiin, "Chumi hlenchhuak tur chuan sorkarin hma a la zel dawn a ni," a ti a; Champhaiah kûtpui leh puipun thlenna hmun tur bik Zokhua din tum a nih thu a puang.

Champhai DC Dr Naveen Aggarwal pawhin thu a sawi a; YMA leh MHIP branch hrang hrang te, MUP-te leh cultural club-te'n hnam lâmte an entir a ni, Chapchar Kut Miss thlan a ni bawk.

Chapchar Kût hi Kolasib-ah chuan Ṭumpui khelmualah lawm a ni a; minister K Lalrinliana chu kût pa niin, district bawrhsap Zoengsanga chu kût thlengtu a ni. Kût Pa hian Kolasib tihmingṭhatu mi pali hnenah chawimawina thuziak a hlan a ni a; Mizo zai leh hnam lâm chi hrang hrang pholan a nih bakah, intihlimna hrang hrang neih a ni a, chawhnu lamah Chapchâr Lunglen hun hman a ni.

Serchhipah chuan Leisekawt Field-ah hman a ni a, district bawrhsap Sangchhin Chinzah chu kût nu niin, DRDA project director VL Remliana chu kût thlengtu a ni. Hnam lâm leh zai chi hrang hrang entir a nih bakah, MUP-te'n thiamhnáng deh an entir a, MHIP-in la deh dan an entir thung. Chanmary branch YMA-in thingpui sen leh kurtai an buatsaih a; Miss Chapchar Kût atan Lalthlamuankimi, P&E Veng Branch thlan a ni.

Mamitah chuan GSA Playground-ah lawm a ni a, Mamit bialtu MLA H Lal­zirliana chu kût pa niin, additional DC Jacob Lalawmpuia chu kût thlengtu a ni. Hnam lâm leh zai, Mizo nun hluia thil chi hrang hrang entir a ni a, Chapchar Kût Miss an thlang bawk.

Khaw dangah Chapchar Kût
Chapchar Kût hi Vairengteah pawh Joint YMA huaihawtin khelmualah an hmang a, School Education minister Lalchhandama Ralte-in a hmanpui. Vairengtea YMA branch hrang hrang leh cultural club-te'n hnam lâm an entir a, costume parade, kalchhet, inkawibah, Mizo inchaite entir a ni.

Khawzawlah chuan Chapchar Kût hi Mualvawm Field-ah hman a ni a, minister of state Robert Romawia Royte chu kût pa a ni. Minister chuan, Chief Minister leh Deputy Chief Minister-te hmalaknain Khawzawl Mualvawm Field-ah phûl lem phah turin sum sanction tihfel vek a ni tawh niin a sawi a, "Sorkarin hna ṭan thuai a tum," a ti.

Thenzawlah chuan sorkar aṭanga suma puihna tel loin mi ṭhahnemngaite huaihawtin Loṭhazawlah Chapchar Kût hlim taka hman a ni a, mipuiin an hlut hle. Mizo hnam lâm chi hrang hrang entir a ni a, PWD chief engineer R Lal­rintluanga chu kût pa a ni.

Zobawk Group YMA pawhin District Park-ah Chapchar Kût lawmna hun an buatsaih a, Lunglei High Powered Committee vice chairman Lawmawma Tochhawng, MLA chu kût pa a ni. Zobawk Group YMA huam chhunga branch 12-te'n hnam lâm, zai leh mi­zawn inchuhte an entir a; Leitlang Dingdi leh naupang aṭangin Chapchar Kût Nauban an thlang.

Kawnpuiah pawh Joint YMA buatsaihin VC-III Complex-ah Chapchar Kût an hmang a, bialtu MLA Andrew H Thangliana chu kût pa niin, 1st. IR battalion commandant J Lalṭhafamkima chu kut thlengtu a ni. Kûtah hian Kawnpui town area YMA branch hrang hrangte'n Mizo pi leh pute ziaráng pho lang thei thil chi hrang hrang entir a ni.

Lungsenah pawh LGSA Playground-ah Chapchar Kût lim taka lawm a ni a, Lunglei district MJA president H Lalthansanga chu kût pa a ni.