PUC-ah Poetry Festival buatsaih
Sahitya Akademi bultumin nimin khan Pachhunga University College (PUC) Seminar Hall-ah Mizo Poetry Society leh PUC Mizo department chuan hlachham kûtpui, Poetry Festival for Young Mizo Poets vawi thumna an buatsaih a, Higher &
Technical Education minister Dr R Lalthangliana'n a hawng.
Dr R Lalthangliana chuan, Mizo hla ṭha leh hlu tak takte chu hnam dang chhiar theiha lehlin zel a ṭul thu sawiin, "Mizote hian kan thu leh hla hmangin khawvel kan déngchhuak thei a, khawvel kan hneh thei a ni," a ti a; Poetry Festival chu tun aia lian zawk, university leh college dangte tel theihna tura la buatsaih zel ṭha a tih thu a sawi.
Festival hawnna hi PUC Mizo department-a assistant professor Dr Zoramdinthara'n a kaihruai a; Sahitya Akademi regional secretary Dr Devendra Kumar Devesh, Sahitya National Council member Darchuailova Renthlei, PUC principal Dr Tawnenga leh Mizo Poetry Society president Prof. RL Thanmawia te pawhin thu an sawi.
Festival coordinator H Laldinmawia, PUC Mizo assistant professor-in report a pek danin, Festival-ah hian ṭhalai kum 40 hnuai lam hla phuah thiam mi 30-te'n an hlate an chhiar chhuak dawn a; vawiinah chhunzawm a ni ang.