MIMER leh Referal Hospital thuam ṭha zel

Mizoram sorkar chuan sorkar laipui puihna leh state sorkar sumin MIMER leh State Referral Hospital, Falkawn thuam ṭhatna atan medical college leh hospital inkawp tur building a sa mek a, cheng vbc. 180 sênga sak tum a ni.

MIMER-a thawkte'n Vanglaini an hrilh danin, building sakna tur sum hi chi hrang hrang pali atan a ni a; Building for Medical College atan cheng vbc. 69, Infrustructure for Students Faculty atan cheng vbc. 40, Referral Hospital tihhmasawnna atan cheng vbc. 30 leh hmanraw lei nan vaibelchhe 50 a ni.

Hmanraw leina bikah lei tur zinga 90% lei a ni tawh a; building sakna atan hian central sorkar aṭangin cheng vbc. 155 leh state sorkar aṭangin cheng vbc. 14 dawn tawh a ni a, cheng vbc. 20 erawh an la dawng lo.

Damdawi-in tana blood bank hawn tharah thisen thliar hranna (component seperator) license an la neih loh avangin thisen pek chhuah theih a la ni lo. Tunah hian component seperator khawl paruk an nei tawh a, company chi hrang hrang siam a ni. Hetih lai hian, mi tlawmngaite thisen pek erawh an dawng fo tawh thung.

Drugs Controller of India/Central License Approving Authority aṭangin kum nga chhung atan blood bank license pek a ni a, kum 2018 khan pek niin, kum 2023 thleng dam tur a ni.