Sorkarin hma thar alak a ngai -MPCC

Mizoram Pradesh Congress Committee (MPCC) Media department chuan thuchhuah siamin, ni 14 inkhârkhip chhungin Mizo ramah Covid-19 vei pakhat bak hmuh a ni lo chu lawmawm an tih thu an sawi a; chutih rualin, Mizoram sorkarin awmze nei zawka hma thar a lak a ngaia an hriat thu an tarlang.

MPCC Media chuan, India ram hmun dang leh  ṭhena wm state-ah nasa taka Covid-19 a darh mek vangin in kharkhip chhunzawm a ṭul thei a, tunah pawh mipuiin ei leh bara harsatna an tawh ṭan tawh thu sawiin, "Local/ village task force-te kutah supply sem hna dah ngawt loin, Mizoram kilkhâwr ber thlenga ei tur mamawh chi hrang hrang pek a nih theih nan awmze nei lehzualin sorkarin hma la se kan duh.

Chief Minister leh minister dangte pawhin an bial tan chauha hma la loin, Mizoram pum thlira chak taka hma an lak a hun a ni," an ti. MPCC chuan, "Ṭhenawm state-ahte a vei an pun zel avangin ramri venhimna lamah sorkarin nasa lehzualin hma la se. Ramri ven a pawimawh zual ęm avangin tualchhung mite kuta dah mai lo a, ramri tluana duty tur police dah belh a ngai tak zet," an ti a; ramria duty-te invenna tur hmanraw ṭha pek a ṭul thu an sawi.

Congress party chuan, Mizoram sorkarin Covid-19 dona tur sum a nei lo tih chu thup tlat loa puan mai a hun ta hlea an ngaih thu sawiin, "Local task force ṭanpuina tur sum a nei lo a, mipui, kohhran leh pawl thawhkhawm CM Relief Fund hmangin a pui ringawt a ni. CM-in March 28 khan TATA Trust neitupa Ratan Tata hnenah ṭanpuina a dil ringawt bawk," an ti.