Tumkau Ni puala kohhran hruaitute thuchah

Vawiin Pathianni hi Kristiante hun pawimawh, Tumkau Ni a ni a, Vanglaini chuan Mizorama kohhran ṭhenkhat hruaitute Tumkau Ni puala thuchah tawi an siamte a la khawm: Mizoram Synod moderator Rev. R Lalchangliana chuan, kum dang ang lo takin kuminah chuan coronavirus avangin Tumkau Ni hman theih a ni lo a, Isua chawimawi nan kawngzawh theih a ni lo tih a sawi a, "He hun khirh leh harsa takah pawh Jerusalem-a Isua a luha ropui taka an lo chawimawi ang khan, kan thinlunga chawimawina hi kohhran programme angin hmang thei lo mah ila, thinlung ril berin i chawimawi ang u," a ti a; thinlung taka Isua chawimawia fak turin mipui a sáwm. Baptist Church of Mizoram (BCM) president Rev. Dr K Lalrinthanga chuan Vanglaini chhiartu zawng zawngte Túmkau Ni chibai a buk a, "Vawin hi Tumkau Pathianni a ni a, kum dang angin zing karah leh biak-inahte hun kan hmang thei lo. Mahni inah tal chuan Tumkau Ni pualin hun hman tum ṭheuh ila a ṭha ang," a ti.

Rev. Dr K Lalrinthanga chuan, túmkau kenga Isua hmuah a ni chuan lal a ni tih a entir tih sawiin, "Lal a nih dan erawh chu leia lalte ang a ni lo. Remna lalram din tur a nih avangin sabengtung chungah a chuang a, sabengtung hian remna lal a nihna a entir," a ti. "A pawimawh ber chu, nangmahah khan lal a ni em, in chhungkuaah lal a ni em, tih a ni," a ti bawk. Aizawl bishop Most Rev. Stephen Rotluanga chuan, "He hun khirhkhân kan tawn mekin min zirtir, eng mah lo mai kan nihzia te, kan nun derthâwnzia te, kan awm dan tur leh hma lam hun kan hriat lohziate hian, hmangaihna dâi thei lo neitu lamah min hîp hnai zual se," a ti. Bishop chuan, Kristiante hunpui thleng chho mek chu nun thar dik taka hruai luttu ni se a duh thu sawiin, "Coronavirus mai ni lo, a aia hlauhawm zawk kal sual hri ṭha lo - inhuatna, dik lohna, chapona, nawmsitbawlna, hmasialna, duhâmna, etc. min nuaibosak se," a ti a; thlarau lama hlâwkna chang a, hlimna, thlamuanna leh damna chang ṭheuh turin mi tin duhsakna a hlan a ni.

Salvation Army (SA) India Eastern Territory-a commander Commr. Lalzamlova chuan, kumina Tumkau Ni chu inkhârkhipna hnuaia hman a ngai chu kohhran mite duh dan ni lo mah se, hlâwk thei anga remchanna lei thiam turin a ngen a; khawtlang hruaitute remruatna a awm chuan zâwm tura a ngen rualin, ruahmanna a awm lohnaah chuan lockdown kaihhruaina bawhchhe loin mahni remhriat dana ruahmanna siam turin SA mite a chah. SA IET Commander chuan, "Lal Isua'n, 'He tlángah kher lo pawh, Jerusalem khuaah kher lo pawh, Pa chibai in buk hun a thleng dâwn ta... a hun a thleng dâwn ta, tunah pawh a thleng tawh mek...' tia a sawi kha a takin kan tawng mek a ni ber. Mahni hmun ṭheuhah thlarau leh tih tak zetin Lalpa chibai bukin a lam i hawi ang u," a ti.

UPC (North East India) general secretary Rev. R Lalrinsanga chuan, Isua Krista lal anga chawimawina ropui tak nen Jerusalem-a a luh hriatrengna ni hmangtute duhsakna chibai a buk a, "Lalpa Isua hi sual bâwih ata min tlan tura inngaitláwm taka lo kal ni mah se, lal a nihna puan chhuah a duh avangin chawimawina ropui tak nen sabengtungno chungah chuangin Jerusalem-ah a lut a, hei hian Remna Lal a nihzia a entir," a ti. Rev. R Lalrinsanga chuan, Lal Isua'n lal a nihna chu puan chhuah a, lal a nih anga chawimawi a duh tih sawiin, "Ringtu zawng zawngte'n he ni pawimawh takah hian kan Lalpa Isua Krista hi lal ber lukhum i khumtír ang u, lal berte lal ber, pathiante Pathian a ni si," a ti a, Isua chawimawi turin mipui a sáwm.

Mizoram UPC general superintendent Rev. C Lalremsanga chuan, "Sabengtung chu sa ropui ni lo mah se, a chungah lei leh van lal ber Isua a chuang a, chawimawina ropui dawngin a kal nan an puante an phah a sin," a ti a; mipuite chu Isua Krista chuanna tlak an nih theih nan inbuatsaih tura chahin, "Amah a lan hun apiangah ropuiin i lang ve ang," a ti.