Dampa Tiger Reserve vengtu Tiger Protection Force bàn an ni

Mamit district-a Dampa Tiger Reserve vengtu Tiger Protection Force-te chuan thla ruk chhung hlawh an lak tawh loh avangin April 8, Ningani khan West Phailenga Field Director pisa tualah lungawi lohna an lantir a; lungawi lohna an lantir hnuah an hna aṭanga bàn an nih thu an hria.

Tiger Protection Force-te sawi danin, Dampa Tiger Reserve vengtute chu mi 170 vel an ni a, October 2020 aṭangin hlawh an la tawh lo. An lungawi loh avangin April 5, 2021 aṭang khan hna an thawk lo a, lungawi lohna lantir nan April 8-ah West Phailenga Field Director pisa tuala pungkhawm turin an inruahman bawk.

April 6-ah EFCC department hotute nen an inbia a; department hotute chuan, sorkar laipui aṭangin an hlawh tur an dawn loh avangin a remchan dan ang anga sum pawt khawmin, thla thum hlawh tur pek an tum thu an lo hrilh. Dampa vengtute chuan thla thum hlawh tur chu tun tun kár chhunga tifel turin an phût a, a bâk thla thum dang hlawh tur pawh April thla chhung ngeia tifel turin an phût bawk. Sorkarin October-December hlawh pek tum mah se, an lo ruahman lâwk tawh angin April 8 khan lungawi lohna lantirin West Phailengah an pungkhawm a ni.

Lungawi lohna an lantir zawh­ah an ruahman lâwk angin April 9, nimin aṭangin hna an chhun­zawm tur thu Field Director hnenah an hrilh a; mahse, Field Director chuan duty-a an kal a ngaih tawh loh thuin a lo chháng thung. April 2021 aṭangin Tiger Protection Force thar lâkna tur hriattirna a chhuah tawh thu a sawi bawk.

Field Director-in a tarlan danin, National Tiger Conserva­tion Authority aṭangin thawktute hlawh daih tur an dawng lo a, thla ruk daih chauh hlawh tur an rawn pek bakah, budget tihtlem a ni a, harsatna a thleng ta a ni. National Tiger Conservation Authority aṭangin kum hmasa aia tam sum hmuh a beiseiawm loh a, state sorkar tum tur 10% bak hmuh a beiseiawm loh avangin kum 2021-22 atana Tiger Protection Force rawih zat pawh tihtlem tum a ni. Thawktu thar lak turah hian tuna thawk laite aṭanga lak leh tur a nih thu tarlan a ni bawk.

Hetih lai hian, Tiger Protection Force-te chuan, an hna aṭanga bàntir a, a thara lak tumna chu an duh loh thu leh a tàwp thlenga dodal an tum thu an sawi.