Vawk sample test result kar lehah

Lunglei district chhung, Lung­sen khuaa March 21, 2021 aṭanga vawk 320 chuang thih chhan finfiah tura National Institute of High Security Animal Diseases (NISHAD), Bhopal-a vawk sample thawn result chu chawlhkar tharah hriat theih beisei a ni.

Tarlan tawh angin, AH&Vety doctor pakhat chuan April 7, Nilaini khan vawk sample chu NISHAD a panpui a, Ningani khan a thleng a ni. Lungsena vawk thih chhanah hian African Swine Fever (ASF) rinhlelh a ni a, mahse, ASF a ni ngei tih puang theitu chu India ramah chuan NISHAD chiah hi a ni.

Hetih lai hian, AH&Vety minister Dr K Beichhua chuan, Lungsen mipuite harsatna tawh mek chu a tawrhpui thu leh hmun danga a darh zel lohna tura theihtawp chhuah a ṭul thu a sawi a; vawk hri léng chu ASF a nih ngei a rinawm thu sawiin, "ASF hi a kái tawh chu an thi vek a, a danna damdawi (vaccine) leh a enkawlna tur bik damdawi a la awm lo," a ti.

AH&Vety Minister hian April 8, Ningani khan Lungsen a tlawh a, vawk thite leh an phûmna hmunte a enfiah a ni. Ningani vek khan Lunglei DC pisa conference-ah sorkar hotute leh vawk hri léng chungchanga a kaihhnawih theih páwl hruaitute a kâwm bawk.

Lunglei DC pisaa ṭhutkhawmah hian AH&Vety department hotute chuan, ASF chu mihring tan hlauhawm lo mah se, a kài darhtu leh pu darhtu an nih theih thu an sawi a; vawk leh ran damlo leh thi rinhlelhawm nei te, vawk tawlh rûk chungchang hriate chu Lunglei District Rapid Response Team hnena hriattir thuai turin an chah a ni.