KHAWTHLIR
MIZORAM TAN NUAI 300 PE
Ministry of Development of North Eastern Region (DoNER) minister Dr Jitendra Singh chuan April 3, Zirtawpni khan DoNER, North Eastern Council (NEC) leh NEDFi hotute video conferencing a neihpui a, Covid-19 in hmarchhak a nghawng dan te, hmalakna leh ruahmannate an sawiho. NEC chuan hmarchhak state-te'n Covid-19 hripui do kawnga chak zawka hma an lâk theih nan untied fund anga hman turin cheng nuai 2500 a ruahman tawh a, Mizoramin nuai 300 a chang a ni.
HOSTEL-IN PE
T Romana College Girls Hostel-a awm zirlaite chuan an session tawp huna an inthlahna tur leh intihhlimna tura pawisa an khâwl chu Republic Veng, Upper Republic leh Republic Vengthlang local task force-te hnenah lawmthu sawi nan leh a ṭula hman atan Rs. 4,500 ṭheuh an hlân.
THISEN PEK HUN RUAHMAN
AVBD leh NSS state office ruahman angin nimin khan Aizawl Civil Hospital-ah blood donation camp neih a ni a, NSS volunteer mipa 34 leh hmeichhia palite'n thisen unit 38 an pe. Aizawl North College NSS-te'n unit 14, T Romana College NSS-te'n unit 16 leh Mizo Higher Secondary School NSSte'n unit 8 an pe a ni.
THILPEK HLAN
Palak bialtu MLA KT Rokhaw chuan a biala village task force (VTF) tin hnenah hmai tuamna, kutkawr leh hand sanitizer a sem.
SANGHA HRALH
Lawngtlai District Supply Chain hmalaknain nimin khan Fisheries department chuan Lawngtlaiah Bungtlang South-a sangha dil siamtute thar kg. 70 an hralh
NGHAM LAWM
Non Government Hospital Association of Mizoram (NGHAM) chuan, an doctor leh thawktu dangte hman tur personal protective equipment (PPE) Mizoram sorkarin a pek avangin lawmthu an sawi.
MAN TUR AWM RENG
Aizawl SP C Lalruaia chuan Vanglaini palai zawhna chhangin, curfew bawhchhia man tur an awm reng thu a sawi. Curfew bawhchhia ṭhenkhat chu police lock up-a an khung hnuah an chhuahtir a, ṭhenkhat chu an hawtir ṭhin tih sawiin, "Curfew bawhchhiat vanga thubuai siamsak kan la nei lo," a ti.