Assam-in Vairengtea in sate an vau Mizoram official-te'n sa zel turin an ti

Assam sorkara District Forest Officer (DFO) leh police eng emaw zat chuan April 8, Ningani khan Vai­rengte VC-I-te'n kawng an siam mek leh ram an ṭheha in sate chu chawlhsan turin an hriattir. Vairengtea sorkar hotute erawh chuan, hlau lo tur leh hna thawk chhunzawm turin an ti a, niminah pawh hna an thawk chhunzawm.

Vairengte aṭanga thu dawn danin, Assam leh Mizoram sorkarin nikuma ramria buaina a neih hnuah tun hmaa Mizoram miin an la luah ngai lohna auto-rickshaw stand, Kawngthar Veng aṭanga high school tuikhuah panna kawng laih a ni a, VC-te'n ram an ṭheh nghal. Ram ṭhehah hian mi 70 hnenah hmun pek a ni a, mi 30 vel chuan in an sa ṭan mek a ni.

Assam DFO leh police-te chuan, kawng laih hna thawktute leh in satute chu tu thua sa nge an nih tih an zawh bakah, hnathawh chawlhsan turin an hriattir a; thlate an lâk hnuah buaina siam zui loin Assam lamah an lêt leh nghal.

Assam sorkar mite an kal thu hriat a nih veleh Vairengte SDO (Civil) Isaac C Lalrempuia thu angin SDPO Ramtharnghaka chuan thil thlenna hmun a pan nghal. SDPO chuan, kawng laitute leh in sa mekte chu an hna chhunzawm turin a hrilh a, "Hna in thawk thei dawn lo a nih a, silai nen vèn in ṭul pawhin kan véng mai ang che u," a ti.

Vairengte SDPO sawi danin, Assam DFO leh police-te chuan auto-rick­shaw stand bulah an lirtheite dahin, Vairengte high school tuikhuah piah, nikuma naupang bona hmun, Assam lam ramri aṭangin kein an kal a; ramria duty BSF leh Mizo IR duty-te tan hmuh an har niin an sawi.

SDO (C) Ramtharnghaka chuan ramria BSF leh Mizo IR duty-te chu a tlawh nghal a, Assam Forest leh police-te chu rawn kal leh an tum a nih chuan silai nena lo dang turin a hrilh a ni.

Nimin pawh khan Assam mi leh sate chu Ningania an kalna aṭang thoin an kal leh a, harsatna siam loin an kir. Hetih lai hian, Assam civil mite chu camera nen in sakna chhakah an kal bawk a, Mizo IR duty-te'n an hmu a, an hnawt kir a ni.