KHAWTHLIR
Covid-19 vei exam tir loh tur
MBSE chuan April 8, Ningani khan hriattirna chhuahin, HSLC leh HSSLC exam neih meka zirlai exam zingah Covid-19 vei an awm chuan exam chhunzawmtir loh tur a nih thu a tarlang a, "An tan MBSE-in ruahmanna a la siamsak ang," a ti. Exam mek zingah hripui vei an awm a nih chuan a rang thei ang bera MBSE Secretary hriattir turin an chah a ni.
Thisen pe
Hriangtlang Branch KṬP chuan nimin khan an kohhran hall-ah thisen pek an huaihawt a, Serchhip District Hospital tan thisen unit 21 an pe a, a petute mipa 12 leh hmeichhia pakua an ni.
SRH-ah mi 12 awm
State Referral Hospital-ah nimin khan dah luh thar mi pathum leh chhuahtir mi pakhat an awm a, mi 12 enkawl mek a ni. SRH-ZMC Bulletin tarlan danin, mi 12 zinga pahnih chu ICU-ah an awm a, pakhat zawk chu ventilator hmantir mek a ni.
Kangmei tuarte CSC-in tanpui
March 13, 2021 a Maubawk Venga chhungkaw 15 an chenna in kangte chu nimin khan Mizorama Common Service Centre (CSC) member-te chuan an awmnaah kalchilhin kangmeiin a kan chhiatpui an document hrang hrang - Aadhar card, tribal certificate leh residential certificate-te a thlawnin an siamsak. CSC Maubawk veng chhung mipui tan document-te hi neiin an siamsak nghal a, chuta ṭanga an sum hmuhte chu kangmei tuarte tan an hlan.
DC-in ramri tlawh
Kolasib DC Dr H Lalthlangliana chuan nimin khan Vairengte leh Saihapui-V khaw dáia BSF duty-na hmun thawm ṭhat mek te, Vairengte damdawi-in, police station leh Covid screening point a tlawh a; Vairengte SDO (C) pisaah tlawmngai pawl hrang hrang hruaitute nen an inkâwm. Bawrhsap hi SDO (C) Isaac C Lalrempuia, Bilkhawthlir BDO Neng Thianlala leh official dangte'n an ṭawiawm a ni.