COVID-19: Mizoram dinhmun November 23, 2020 hnua hripui vei Hmuh chhuah tam ber ní a thleng

April 8, Ningani khan Mizoramah Covid-19 vei mi 36 hmuh chhuah a ni a, nikum November 23 hnua hripui vei hmuh chhuah tam ber ní a ni. Nimin khan hripui laka fihlîm tawh mi pathum chhuahtir an ni thung.

Covid-19 vei hmuh tharte chu ZMC laboratory-a hmuh chhuah pakhat, TrueNAT-PCR hmanga hmuh chhuah pahnih leh RAT hmanga hmuh chhuah mi 33 an ni a; an zingah natna (symptom) lang mi 18 an awm a, Mizoram chhunga kái nia hriat mi 13 an awm bawk.

Ningania Covid-19 positive mi 36 hmuh chhuah hi November 23, 2020 hnua hmuh tam ber ní a ni a, kha mi ní khan hripui vei mi 50 hmuh chhuah a ni. Nikum November thla kha Covid-19 vei hmuh chhuah tam thla niin, mi 1,089 hmuh chhuah a ni a, chawhrualin ni khatah mi 36.3 zel hmuh chhuah an awm ang a ni.

Hripui laka fihlim tawh nimina chhuahtirte chu SRH-ZMC aṭanga chhuahtir Hnahthial district mi pakhat leh Durtlang BSUP CCC aṭanga chhuak mi pahnih an ni.

Mizoramah Covid-19 vei mi 4,558 hmuh chhuah a ni tawh a, mipa 3,304 leh hmeichhia 1,254 an ni. Nimin tlai dar 5 thleng khan mi 4,457 (97.78%) chhuahtir an ni tawh a, mi 11 (0.24%) thi tawhin, enkawl mek mi 90 (1.98%) an awm.

April 8, Ningani khan ZMC laboratory-ah swab sample 56, TrueNAT-PCR hmangin Lunglei leh Siahaah sample panga leh RAT hmangin district pariatah sample 1,327 endik a ni a; sample endik zawng zawng chu 1,388 niin, chu'ng aṭanga hripui vei hmuh 36 chu 2.60% a ni.

Ningania Covid-19 positive hmuh thar mi 36-te chu Mizoram páwn aṭanga rawn lut hlim leh tun hnaia rawn lut mi 26 leh zin chhuahna nei lo, tualchhunga hri kái chhâwng mi 10 an ni a; heti hian Mizorama district 11 zingah hripui vei mek awm lohna district pali chiah (Siaha, Lawngtlai, Saitual leh Khawzawl) a awm leh tawh.

April 8, 2021 thlengin Mizoramah swab sample 2,59,943 endik a ni tawh a, chu'ng aṭanga Covid-19 positive hmuh tawh zat 4,558 chu 1.75% a ni. Hripui vei hmuh tawh zinga mi 2,155 chu Mizoram chhunga kái chhâwng an ni a, mi 2,403 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,668 hmuh chhuah a ni tawh a, TrueNAT-PCR hmangin 681 leh RAT hmangin 1,208 hmuh chhuah a ni tawh.

Covid-19 vei hmuh tharte
ZMC-a hmuh chhuah:
Hunthar Veng - 1: Mipa kum 40, April 1, 2021-a Delhi aṭanga rawn lut, thlawhnaa a chuanpuiin hripui a vei vanga ina inkhung lai, symptom nei lo.

TrueNAT-PCR-a hmun:
Lunglei Zotlang - 1: Hmeichhia kum 23, Pune aṭanga tun hnaia haw, thlawhnaa a chuanpuiin hripui a vei vanga inkhung hrang lai, symptom nei lo.
Lunglawn - 1: Hmeichhia kum 23, Pune aṭanga tun hnaia haw, thlawhnaa a chuanpuiin hripui a vei vanga inkhung hrang lai, symptom nei lo.

RAT hmanga hmuh:
ITI Veng - 1: Hmeichhia kum 24, Delhi aṭanga haw, Lengpui Airport-a hmuh chhuah, symptom nei lo.
Luangmual, Aizawl - 1: Hmeichhia kum 26, Delhi aṭanga haw, Lengpui Airport-a hmuh chhuah, symptom nei.
Sihhmui - 1: Hmeichhia kum 28, Goa aṭanga haw, Lengpui Airport-a hmuh chhuah, symptom nei lo.
Lunglei - 1: Hmeichhia kum 53, cancer vei mek, Guwahati aṭanga haw, Lengpui Airport-a hmuh chhuah, symptom nei lo.
Bawngkawn South - 2: Mipa kum 6 leh 13, Lucknow aṭanga tun hnaia haw, symptom an neih vanga Bawngkawn Kiosk-a sample endiktir.
Chawlhmun - 2: Mipa kum 16 leh hmeichhia kum 22 unau; hmeichhia tun hnaia Mumbai aṭanga haw, a hnua symptom an neih avanga Chawlhmun Kiosk-a sample endik.
Damveng - 6: Mipa 1 leh hmeichhia 5 (kum 6-57), chhungkaw khata chêng; symptom an nei vanga private hospital pakhata sample endiktir, hri kaina hriat loh.
Kanan Veng - 1: Hmeichhia kum 22, hostel-a awm lai, symptom a neih vanga private hospital-a sample endik, hri a kàina hriat loh.
Chhinga Veng - 1: Hmeichhia kum 23, hostel-a awmpui Covid-19 vei a awm vanga sample endik, symptom nei.
Champhai Vengthlang - 4: Mipa kum 8 & 42 leh hmeichhia kum 3 & 13, chhungkaw khata chêng; symptom an neih vanga sample endik, hri an kàina hriat loh.
Mizoram Police - 12: Mipa kum 23-60 inkar, Assam inthlanpui neih meka Nagaon, Assam-a duty rawn haw Vairengte Screening Point-a sample endik, symptom nei lo vek.
Serchhip Chhimveng - 1: Mipa kum 21, April 5-a Hyderabad aṭanga haw, RT-PCR test negative certificate a neih vanga Lengpui Airport-a endik loh, Serchhip a thlen hnuah symptom a neih vanga sample endik leh a ni.