Tuipuiralah Myanmar ráltlân ṭanpuina pe

MZP General Headquarters leh Chin Baptist Church, USA-te chuan Myanmar aṭanga ráltlân zinga Farkawn, Khawbung, Thekte leh Thekpui khuaa awm mi 830-te tan nimin khan ṭanpuina ṭhahnem tak an hlân.

Myanmar ráltlânte ṭanpuina pe tur hian MZP general secretary Lalnunmawia Pautu leh hruaitu dangte an kal a, Champhai leh Farkawna MZP hruaitute'n an ṭawiawm bawk. Ei leh in tur leh pawisa, a vaiin Rs. 6,00,000 chuang hù an sem a ni.

MZP leh Chin Baptist Church, USA-in ṭanpuina an pek turah hian mi eng emaw zatin pawisa leh bungrua an thawh a; bialtu MLA Ramthanmawia'n Rs. 20,000, MLA L Thangmawia leh MLA Dr Vanlalthlana ten silpaulin bundle khat ve ve, MLA Lalzirliana leh C Lalsawivunga ten silpauline eng emaw zat leh, KS Thanga'n Rs. 10,000 an pe.

Ṭanpuina chu Farkawnah Rs. 2,30,000, buhfai ip 48, alu ip 6, dailuah ip 6 leh silpauline bundle 1; Thekte-ah Rs. 50,000, buhfai ip 10, alu ip 3, dailuah ip 2 leh silpauline bundle 1; Thekpuiah Rs. 4,000 leh buhfai ip 1; Khawbungah Rs. 20,000, buhfai ip 6, dailuah ip 1, alu ip 1, bucket 2 leh silpauline-te an pe a ni.

MZP General Secretary chuan, Myanmar aṭanga raltlante chu thlamuang taka Mizorama awm tur leh an harsatna chu Mizo mipuite'n an hriatthiampui a, a ṭul apiangah puih an inpeih thu a sawi a; Mizorama an awm chhungin mi dang tana harsatna thlentu ni lo a, khual ṭha nih tum tlat turin a chah.

Ṭanpuina an pekna khuaa khawtlang hruaitute chuan, ráltlân mikhual lut leh chhuak an awm reng avangin a zat dik tak hriat a har thu an sawi a; an duh leh mamawh ber chu, ráltlânte awmna tur hmun siamsak leh Covid-19 laka an him leh him loh endikna mumal taka kalpui te, swab sample endikna dah thuai an mamawh thute an sawi bawk.