PM hoin Covid-19 chungchang sawiho

Prime minister Narendra Modi chuan April 8, Ningani tlai khan state hrang hrang chief minister-te video conferencing hmangin Covid-19 léng chungchang a sawipui a, chief minister Zoramthanga pawh a tel.

PM Narendra Modi chuan, chak zawka hripui vei chhui hna thawh leh swab sample a tam thei ang ber endik a pawimawh thu sawiin, "Hun rei tak he hrik hi lo hmachhawn tawh mah ila, chauh avanga thâ thlahdul thei kan la ni lo," a ti.

Narendra Modi chuan, "Covid-19 positive hmuh chhuah thar aṭanga darkar 72 chhungin a hnimhnaih mi 30 tal chhui chhuak a, sample endik a, a ṭul anga khunng hran ni se," a ti a; Covid avanga thite dinhmun chhinchhiah a pawimawh thu a sawi.

Sorkarin inkaihhruaina a siamte ṭha taka zawm a ṭul thu sawiin Prime Minister chuan, "Chak leh huap zau zawka vaccine pek ni se," a ti a; state tin hotute chu fimkhur tura inzirtirna ngawrh zawka kalpui turin a chah.

Covid-19 chungchang sawihonaah hian CM Zoramthanga hi Health minister Dr R Lalthangliana, chief secretary Lalnunmawia Chuaungo, Addl. Chief Secretary, Health Secretary, NHM Mission Director, Covid-19 Spokesperson leh Health department hotu dangte'n an ṭawiawm a ni.