Champhaiah NDPS Act zirho

Mizoram State Legal Services Authority (MSLSA) leh Champhai District Legal Services Authority (DLSA) chuan nimin khan Champhaiah The Narcotic Drugs and Psychotropic Substances Act zirhona an buatsaih a, Gauhati High Court, Aizawl Bench judge Justice Michael Zothankhuma'n a hmanpui.

Justice Michael Zothankhuma chuan, ruihhlo leh a kaihhnawihte'n khawvel pumah nghet takin bu an khuar tawh tih sawiin, "India ram pawh ruihhlo hluarna ramte'n a hual avangin ṭhenawm ram aṭangin a lo lut nasa ṭhin. Ruihhlo tawlh leh zuar man ṭhinte dan hnuaia hrem an nih ngei theih nan ṭan lak zual a ngai hle," a ti a, thil sual tite man an nih aṭanga chargesheet siam thlengin tihsual nei lo tura fimkhur a ngaih thu a sawi.

Ruihhlo tawlh venga tlawmngaia thawk chhuak ṭhin YMA-te chu ruihhlo tawlh leh zuarte dan anga hrem an nih theih nan thuhretu ṭha tak nih tum tura chahin Michael Zothankhuma chuan, "Dan hi India ram puma zawm tura duan a ni a, dan pumpelh zawnga kal a pawi thei. A nih ang anga dan zawm thlap hi a kalkawng thui deuha kan hriat avangin pumpelh zawnga kalpui kan tum ṭhin a, a fuh lo ṭhin a ni," a ti.

Champhai DC Maria CT Zuali pawhin thu sawiin, ruihhlo leh a kaihhnawih avangin Champhai District Jail-ah táng eng emaw zat an awm thu a sawi a, "Ramri depa awm Champhaiah ruihhlo ngai tam tak an awm. Natna inkài chhàwn theih nen a inkawp tlat avangin ngaimawhawm tak a ni," a ti a; ruihhlo tawlh leh zawrh vengtute'n ṭhahnemngai taka thawka man an nei ṭhin chu fakawm a tih thu a sawi.

NDPS Act zirhonaah hian Law & Judicial officer, Police, Excise & Narcotics mite leh YMA hruaitute an tel a ni.