Vawk hri vangin Aizawla veng pahnih infected area-ah puang

Animal Husbandry & Vete­rinary department chuan, Aizawla Armed Veng leh Edenthar Vengah vawk hri hlauhawm tak a lèn avangin veng pahnihte hi infected area-ah an puang.

AH&Vety department thu­chhuah tarlan danin, Armed Veng leh Edenthar Vengah hian vawk hri hlauhawm tak a léng mek a, hri dinhmun chhui chian mek a ni. Hri léng a darh zel lohna atana danchah a ngaih avang leh Aizawl district mipui ṭhatna atan veng pahnih chu infected area-ah puan a ni.

Veng pahnih aṭangin vawk phurh chhuah leh veng dang aṭanga lak luh te, vawk damlo emaw, a dam emaw pawh talh khap a ni a; vawk thi rêng rêng chu phûm tur a ni.

Vanglaini palai zawhna chhangin Armed Veng local council (LC) chairman R Lalzuiliana chuan, an vengah chhungkaw pakhat vawk eng emaw zat a thih thu a sawi a, "Hei hi AH&Vety lamin an endik hnuah Lungsena vawk thih chhan nena inangin an hria a ni. Department-te hi puih an ngaihnaah chuan theihtawp chhuahin kan pui zel ang," a ti.

Edenthar Veng LC chairman C Ramliana chuan, an venga vawk pakhat thi chu AH&Vety lamin an enfiah hnuah infected area-ah an veng chu puan a ni tih sawiin, "Mi dang aṭang chuan vawk hri chungchangah report kan la dawng lo," a ti a; lehkha an hmuh veleh department thu zâwm turin veng mipui an hriattir nghal thu a sawi.