District pali-ah NLUP Kûtpui atan Cheng vbc. 1.23 hman a ni

Kum 2018-ah NLUP Kûtpui hman a ni a, khawpui pali-ah hman niin, chuta tan chuan sorkar sum Rs. 1,23,97,825 hman a ni. Aizawl bik atan Rs. 80,90,384 hman a ni.

Vanglaini chuan NLUP Kûtpui atana Aizawl bika sum hman zat chu Rs. 80,90,384 a nih thu a lo tarlang tawh a; district danga NLUP Kûtpui hmannaa sum sen zat pawh RTI Act hmangin dil a ni a, Lunglei, Siaha leh Champhai district-a mite'n chhânna an pek laiin, district dang pali - Serchhip, Kolasib, Lawngtlai leh Mamit district-te'n a hunah a chhanna an peih hman lo.

RTI Act hmanga zawhna chhannaa a lan danin, district pathum - Lunglei, Siaha leh Champhai district-tea NLUP Kûtpui hmanna atana an sum sen belhkhawm chu Rs. 43,06,841 a ni a; Lungleia hmannaa sum sen dan chu receipt leh voucher zawng zawng phek 305 laia chhah nen thil tel a ni.

NLUP Kûtpui hi Lunglei district-ah chuan May 17-18, 2018 chhungin hman a ni a, sum hmanna hlawm lian pathuma sum ruahman zat (total fund allocation) chu Rs. 20,00,000 a ni. Cheng nuai 20 ruahman a nih laiin, Rs. 18,80,626 an hmang a, Rs. 1,19,374 an hmang bâng.

General Expenditure (DC Office) bikah a hmanna hlawm pasarih siam niin, an sum dah an hmang tling lo vek a; sum ruahman lâwk Rs. 8,88,750 a nih laiin, Rs. 8,23,192 an hmang a, Rs. 65,558 an hmang bâng. Publicity, local newspaper advertisement bill-ah Rs. 1,50,000 a niih laiin, Rs. 17,400 an hmang bân a; sum hmanna hlawm dang - NLUP line department pariata sem darhah department pathum - Horticulture-in Rs. 5,000), Commerce & Industries-in Rs. 10,372 leh Sericulture-in Rs. 21,004 an hmang bâng a ni.

Champhaiah chuan NLUP Kûtpui hi May 14, 2018-ah hman a ni a., sum hmanna hlawm pakua siam niin, a vaiin Rs. 14,26,905 an hmang. NLUP line department hrang hrang pakuaah Rs. 9,76,823 pek chhuah a ni a; sum senna dang pasarihte chu - stall preparation, decoration, refreshment, hnam chhantu transportation & lodging, hnam chhantu pawl 20% discount rulhna, soloist, bungraw phurhna leh stall ṭha leh participation prize-te a ni.

Siaha district-ah pawh NLUP Kûtpui chu ni khat hman a ni a, an sum hman zawng zawng chu Rs. 9,99,910 a ni. A hmang tam ber Siaha DC Office-in sum hmanna an chhinchhiah chi 33 atan Rs. 5,50,160 an hmang.

Siaha-a Agriculture depart­ment-in Rs. 60,000, Soil & Water Conservation department-in Rs. 60,000, Sericulture-in Rs. 60,000, District Industries Centre-in Photo Exhibition atan Rs. 60,000, IPR Office-in Rs. 29,700, Fisheries-in Rs. 60,000, Horticulture-in Rs. 60,000 leh AH&Vety-in Rs. 60,050 an hmang bawk.