PMAY sum hrêksak an nih vangin Ṭanpuina dawngtute an mangang

Kolasib khawpui chhunga Pradhan Mantri Awas Yojana (URBAN) - Housing for All hnuaia in sak ṭanpuina first instalment dawng tawh, in sak vanga an in luah lai ṭhiat tawhte chu

ṭanpuina sum second instalment an dawn tur hrênsak an nih avangin an mangang tawh hle. Phase-I dawngtute sum dawn zel tur hrên khawtlai a nih avang hian Phase-2 pawh kalpui theih a ni rih dawn loa thu dawn a ni.

Thu dawn danin, Housing for All hnuaiah Kolasib khawpui chhungah in sak ṭanpuina kalpui mek a ni a, in sak ṭanpuina dawngtu mi 310-te bank account-ah first instalment Rs. 60,000 chu October 2018 vel khan thunsak an ni tawh. Assembly inthlanpui puanin a zui tâk avangin in sak ṭanpuina sem chu chhun­zawm theih a ni lo a, inthlan zawh veleh khan PMAY(HFA) chu kalpui zui leh nghal.

In sak ṭanpuina dawnga hma la tawhte chu in sak chhunzawmna tur second instalment Rs. 60,000 pek leh tur an ni a, final instalment-ah Rs. 30,000 pek leh tur a ni bawk. In sak ṭanpuina dawng zingah mi tam takin first instalment an dawn hnuah an in luah laite ṭhiatin hma an la zui nghal a, mi eng emaw zatin second instalment pawh an dil leh tawh a ni.

Hetih lai hian, sorkar thuneitu sang lamin in sak ṭanpuina dawngtute chu ṭanpuina pawisa pek chhunzawm tawh rih lo turin District Urban Development Office, Kolasib chu an hriattir a, chuvang chuan in sak ṭanpuina dawng tawh, in ṭhiat tawh tam takin in sak hna an chhunzawm thei tawh lo a ni.

In ṭhiat tawhte chuan kumina fûr lo thlen turin a nan hman an hlauh thu Kolasib-a thuthar thehdarhtute an hrilh a, "A tam ber chu in luah lai ṭhiatte kan ni a, fûr hmaa sak zawh a nih theihna atan thuneitute'n hma min laksak se kan duh hle a ni," an ti.