KṬP-in HIV/AIDS do chhunzawm an rêl

KṬP Rorel inkhawm Vawi 8-na, Tuikual North Kohhran biak-ina nghah chu nizan khan a ṭiak. HIV/AIDS darh zau zel tur venna kawnga hmalak chhunzawm an rel bakah, Youth Recreation Centre (YRC) puala KṬP member tinte sum thawhkhawm leh an rel.

KṬP Rorel Inkhawm hi General Conferene neih loh kuma neih ṭhin a ni a, kum 2005-ah neih ṭan a ni. Kumina Rorel Inkhawm hi March 1, Zirtawpni zanah ṭan a ni a, Inrinni khan nilengin Central KṬP leader Rev.Dr K Lallawmzuala kaihhruaiin rorel a ni.

Rorel Inkhawm chuan, HIV/AIDS dona kawngah hmalak chhunzawm an rel a; Central KṬP hmalaknain HIV/AIDS darh zau zel tur ven nan poster leh billboard târ te, awareness campaign neihte an rêl a ni. Kum 2019 chhungin ruihhlo ngaite pualin ram pum huap ṭawngṭai rual buatsaih leh ni rawh se, an ti a; kum 2020-21 chhungin kumpuan thupui neih leh an rel rualin, rawtna lut aṭangin CKṬP thlan turah an dah a, kum 2019-20 CKṬP budget atan Rs. 69,26,000 an pawm bakah, kum 2021 Rorel Inkhawmna atan Chaltlang Kohhran biak-in an thlang.

An rorel zingah, ṭhalaite zingah print media-in ngaihhlut a hlawh lehzual theih nana hmalak te, ram leh hnam leh ṭawngte humhalh leh vawnhim zel a nih zel theih nan hmalak te, chhimbial huapa musical meet buatsaihte a tel.

YRC pualin budget a ngai anga siam relin, KṬP member zawng zawngin - Aizawla mite'n Rs. 50, district khawpui danga mite'n Rs. 30 leh khaw dang zawnga mite'n Rs. 20 thawh khaw chhumzawm an rel a; YRC pual vekin Ṭhawhṭanni zan ṭum khat inkhawm thawhlawm dah an rel tel. Kum 2019 chhungin KṬP inkhawm vawi khat thawhlawm Synod Hospital Charity Fund puala lak khawm te, chhawmdawlna pualin KṬP inkhawm ṭum khat thawhlawm dahte an rél bawk.

Report-a a lan danin, bial KṬP zawng zawng (bial 206) aṭangin report a lut kim a, pastor bial 206-ah branch 864 awmin, member 1,51,283 an ni a, mipa 93,542 leh hmeichhia 57,741 an ni. Member tam berna bial Ramhlun North Bialah 2,308 awmin, member tamna ber branch Mission Veng Branch-ah 1,520 an awm a; member tlem berna bial - Buarpui Bialah 42 an ni.

Kum 2018 chhungin KṬP member thi mi 471 an awm a, mipa 429 leh hmeichhia 42 an ni a; member thi tam berna bial - Chanmari West Bial-ah mi 18 an thi a, thi awm lohna bial 70 a awm thung. Kum 2018 chhungin KṬP member innei 3,441 awmin, biak-ina innei 1,538 leh hmun danga innei 2,003 an ni a; KṬP bial hminga missionary châwm belhkhawm chu 403 a nih laiin, branch hminga châwm belhkhawm chu 3,023 a ni. KṬP inkhawm zat chawhrual chu 22.31% a ni a, bial zaipawl nei thei pastor bial 180 an awm.