Sele (Ramsial) thia hmuh a ni

March 2017 aṭanga Lawngtlai district chhung, Lungzarhṭum Tlangpui khuaa selé (ramsial) awm ṭhin leh bâwng rual zinga khawsa ṭhin chu March 1, Zirtawpni zing khan Lungzarhṭum khaw bulah thia hmuh a ni a; a thih chhan chhui chian a nih theih nan Bualpui NG Police Outpost-ah FIR ziah luh a ni.

Thu dawn danin, sele thi hmu hmasatu chu Lalcheuva, Lungzarhṭum Tlangpui khua a ni a; a sawi danin, a bâwng vulh en thlithlai tur leh sele ngaihven tura a kalnaah, mulukawlh thlâwk leh lei lama an bir lut leh ṭhin a hmuh avangin bâwng thi an awm a nih ringin a zawng a, Lungzarhṭum khaw daiah sele ruang a hmu ta a ni.

Lalcheuva hian LADC Forester, Bualpui (NG)-a RO aiawh mektu hnenah sele thih thu a hrilh nghal a, Forester nen ngun takin an enfiah a, silaia kahna hnûhmá leh hliam an hmuh loh thu a sawi.

Hetih lai hian, Lungzarhṭum khawtlang hruaitute chuan March 1 zing dar 7 velah sele ruang hmuhna bul hnaiah silai puak ri an hriat thu an sawi ve thung a; silaia kah hlum ngei nia an ngaih avangin Bualpui (NG) Police Outpost-ah FIR an thehlut. Sele hi mi tu tih hriat lohte'n an lo chan sawm nual tawh a, a chan sawmtute hriat tumin an chhuizui nghal tih Lungzarhṭum khawtlang hruaitute chuan an sawi.

Sele thi ta hi mihring kut tuara thi nia rinhlehna a awm avangin, mihring kut tuara thi a nih chuan, pawi khawihtute man chhuah kawnga thuneitute pui theitu apiang hnenah Biodiversity & Nature Conservation Network (BIOCONE) chuan lawm­man atan Rs. 10,000 an pek tur thu an puang a ni.