KHAWTHLIR

Thisen pe
Tuipuiral Zirlai Pawl chuan an din champha vawi 33-na lawm nan Inrinni khan Hrangbana College-ah blood donation camp an nei a, Aizawl Civil Hospital-ah thisen unit 70 pein, a petute mipa 51 leh hmeichhe 19 an ni. Be­thlehem Branch KṬP chuan an Kohhran Hall-ah Synod Hospital tan unit 38 pein, a petute mipa 33 leh hmeichhia panga an ni a; Champhai Kahrawt Bial KṬP pawhin Champhai District Hospital tan unit 28 pein, a petute mipa 17 leh hmeichhia 11 an ni.

ECM Assembly
Evangelical Church of Maraland (ECM) Assembly vawi 96-na chu March 1, 2019 aṭang khan Siahaa Edenthar Kohhran biak-inah neih a ni a, thupui chu 'In kawngte chu chhût ngun rawh u' tih niin, nizan khan a ṭiak. Inrinni khan nilengin rorel a ni a, moderator thar Rev. C Beima-a'n a kaihruai. Kum 2020-a moderator atan Rev.Dr FC Beichhaw an thlang. Tum ṭum Assembly-ah hian probationary pastor pathum an nemnghet a ni.

Mizoram thlalak
Kolkata-a North East Cameo, International Photography Festival neih meka thlalak thlan chhuah 15 zingah Lianchhiari Lunglen Tlang thlalak a tel. Festival hi February 28 khan ṭan niin, March 6 thleng awh tur a ni a; 'North East Vignettes' tia vuah thlalak 15 thlan chhuah zingah Lianchhiari leh Chawngfianga thawnthua mi Lianchhiari Lunglen Tlang thlalak chu thlan chhuah zingah a tel a ni.

FIR thehlut
Kolasib DIET sum chêt vel danah thil dik lo tam tak a awm nia an hriat avangin MZP Headquarters, Kolasib chuan Anti Corruption Bureau (ACB)-ah FIR an thehlut tih an puang a, DIET Principal chu thil ti dik lo tu berah an puh.

NPP hruaitu
National Peoples' Party (NPP) president Conrad Sangma chuan NPP Mizoram State Unit president atan Hmingdailova Khiangte, MLA hlui a ruat. Vice president atan Lianzuala leh Hmingchungnunga a ruat a, treasurer atan Lalrinzuali dah a nih bakah, national secretary Dr Lalrintluanga Jahau chu Mizoram enkawl tura ruat a ni bawk. NPP hruaitute term hi kum hnih chhung a ni.