V/C-te'n V/C Rules siamṭhat an phût
All Mizoram Village Council Association (AMVCA)-in February 27-28, 2019 chhunga inkhawmpuia an neihah resolution an pass a; Village Council Rules siamṭhat an phût tih an tarlang.
AMVCA chuan, tualchhung inrêlbâwlna dan ṭha aṭang lo chuan ram leh mipui hmasawnna, mipui nunphung nawmna a awm thei lo tih tarlangin, "Mizoram sorkarin rang takin V/C Rules thar siam se, Mizoram State Assembly House-in a pawmpui kan phût. V/C Rules siamṭharnaah hian AMVCA aiawh tel ngei rawh se," an ti.
AMVCA resolution dangte
* Constitution 73rd. Amendment - 73rd Amendment (1992)-in India ram puma thingtlang tualchhung inrêlbawlna tura thuneihna a pek ang hi Mizoram state-ah hman ve thuai kan duh.
* Local Body Grant - 1st. Mizoram State Finance Commission 2015-2020 recommendation, Cabinet Meeting, Mizoram State Assembly leh Governor of Mizoram-in a pawmpui, Aizawl Municipal Council, Autonomouse Council leh Village Council te tana State Own Resources hmuh aṭanga Local Body Grants 15% chanvo a siam hi a taka kalpui thuai kan phût.
* Mizoram thingtlang khaw mipui, khua leh tui dik tak hriat chian a nih theihna atan Village Council Census rang taka neih ni se, chumi atana senso tur Mizoram state budget-ah dah thuai ni rawh se.
* Mizoram thingtlang khuate hmasawnna atan elementary education leh health care ngaih pawimawh bik a ṭul kan ti.
* Central leh state sorkar scheme & project, khaw chhung leh khaw ram chhunga kalpui turah V/C hriatpuina leh pawmpuina tel loa kalpui ni tawh lo se kan duh.
* MGNREGA - Mizoram thingtlang mipuite ni 100 mai bakah, ni 100 aia tam inhlawhna siamsak ve turin state sorkarin ṭan la ve se, Material Component Fund, Village Council kutah lutin nasa lehzuala khawtlang tan hman ṭangkai kan duh.
* District khawpui tinah V/C Rest House sorkarin buatsaih rawh se.
* Thihna leh thil dang vanga V/C member hmun a ruahin sorkarin rang takin bye-election buatsaih rawh se.
* Democracy institution zahawm zel nan V/C member ni lai boralin sorkarin a hminga ràlna tur pawisa budget-ah khung tel rawh se.
* Pém lehkha siam danah kalhmang rualkhai (uniformity) leh fimkhur zawka hman tlan tur AMVCA-in duan chhuah ṭul kan ti.