Lawngtlai District Hospital-in Kayakalp lawmman dawn lawm

Lawngtlai District Hospital chuan Kayakalp 2018 hnuaia damdawi-inte inelnaa Mizorama damdawi-in máwi ber lawmman, 'Most Beautiful Award' an dawn chu March 2, Inrinni khan damdawi-in tualah an lâwm a; Lawng­tlai East bialtu MLA H Biakzauva'n a hmanpui.

H Biakzauva chuan, damdawi-inte chu fai leh thianghlim taka enkawl a nih chuan natna inkai chhâwn theihte tlahniamin, damlote tan pawh hmuh nuam leh hahdamthlak tak a nih tur thu a sawi a, "Damdawi-in thlì leh bawlhhlawh dang a nih dan tur taka sawngbawl a nih chuan rimchhia leh natna hrik awm theihna tam tak boin, thawktute leh pantute tan hriselna lamah a sawt hle dawn a ni," a ti a; sorkar damdawi-in chu mahni ta a nih hria a, a enkawl leh vawn thiang­hlim kawnga ṭawiawm zel turin mipui a sáwm.

Inkhawmah hian LADC chairman V Zirsanga, Central Young Lai Association, Lai Women Association (LWA), Mizo Hmeichhe Insuihkhawm Pawl (MHIP) leh Chief Medical Officer-te pawhin thu an sawi.

Lawngtlai District Hospital hian Kayakalp 2017-ah Mizoram pumah lawmman pahnihna leh most improved award an lo dawng tawh a; thawktute chuan hnungtawlh loa hma sawn zel an tum thu an sawi a ni.