Minister-in office leh hnathawh enfiah
Environment Forest & Climate Change minister TJ Lalnuntluanga chuan March 1, 2019 tlai khan Champhaia EFCC office a a tlawh a; DFO C Lalbiaka leh thawktu dangte'n lo dawngsawngin, an dinhmun leh hnathawhte an lo hrilh.
C Lalbiaka chuan, thawktu indaih loh dan te, ecotourism leh nursery lama an hmalakna te, Green India Mission hnuaia an hnathawh te, roadsite an siam dan te, medicinal plant an kalpui dan leh wildlife chungchanga an hmalakna leh an hnathawh hrang hrangte a sawifiah a, "Tun hmaa Forest department chu ramngaw tichereutu anga an lo hmuh
ṭhin kha a dik tawh lo a, thing leh mau, nungchangte humhalha tipungtu a ni tawh zawk," a ti.
TJ Lalnuntluanga chuan, thawktu indaih lohna sorkarin a hria a, department mamawh hrang hrang pawh a hria tih sawiin, "Tunah hian Central aṭangin fund hrang hrang kan ûm zui mek a, EFCC hi khawro taka a awm ka remti lo a, sum tam tak hâi luh kan tum a ni," a ti a; thawktu indaih loh chungchang chu Chief Minister a sawipui tawh thu leh dil belh turin hma an lak dawn thu a sawi.
Transport minister ni bawk TJ Lalnuntluanga hian March 2, Inrinni zing khan Champhai kawtchhuah Kanan Venga lei min ṭhin leh kawng chhia siamṭha tura PWD leh contractor MRBB Construction-te February thlaa a hrilh tawh chu an hna thawh dan a enfiah. Minister chuan, kawng chu mipui tan a ni tih sawiin, "Department-in an rawn siam laiin uluk takin lo enpui u la, sawisel ngai lai a piang lo sawisel rawh u. Hna reng reng a ṭha tur a ni," a ti.