Zalenna sual turin loh theih lohna vangin MNF-in silai kan chelek - Zoramthanga

MNF party chuan nimin khan an pisa, Mizo Hnam Rûnah March 1, 1966-a independence an puan denchhena Mizo National Day an hman ṭhin chu an hmang. March 1 hi kuminah Chapchar Kût a nih avangin nimin khan an hmang a ni. MNF president Zoramthanga chuan, zalenna sualna atan loh theih lohna avangin silai an chelek niin a sawi.

Mizo National Day hmanna inkhawm hi MNF treasurer Vanlalzawma'n a kaihruai a; MNF President chuan, MNF-in zalenna a sual ṭan tirh laia Assam chief minister Chaliha leh MNF founder president Laldenga ten tharum hmang lo turin inremna an siam thu a sawi a, "Mahse, Assam Chief Minister chuan kum 1966 khan sipai a rawn tìr lut a, Pu Laldenga'n tìr lut lo tura a tih pawhin, tír lut lo thei lo a nih tawh thuin a chháng a ni. A hnua telephone hmanga biak leh a tum pawhin Assam CM pisaa thawkte'n an puin a biak duh tawh loh thuin an lo chháng a ni," a ti.

Chief minister Zoramthanga chuan, India sorkarin MNF movement a len tak tak hmaa tihchimih an tum thu sawiin, "Kan hotute phai lama ṭingmih ṭhak a, kan nationalism tihchimih an tum a, chuvangin, tih tur dang kan nei ta lo. Zalenna sual kan tum a, sipai nen silai leh an lo thawk si a, silai nen lo chêt ve a ngai a ni," a ti a; India sorkar sipai leh silai nena an chêt hmasak avangin, loh theih lohna avangin MNF-te chuan silai nen zalenna an sual ve ta tih a sawi.

Independent an puan chhan sawiin Zoramthanga chuan, "India dan hnuaia kan awm chuan silai kan chelek ve chuan danpui a kalh a, chuvangin zalenna sual thei kan ni lo. Zalenna kan inpek a ngai a, zalenna chu sorkar dangin min pek sak dawn lo. India danpuiin min phuarna ata keimahni leh keimahni zalenna kan inpe a ni. Sorkar thar, army thar, court hran leh parliament-te kan din a, independence kan puang ta a, March 1, 1966-ah India sorkar min phuarna kan thing thla a ni," a ti.

Zoramthanga chuan, 'Zalenna an sual lo' tih chu sawi chi pawh a nih loh thu sawiin, "Sorkar, army, court leh parliament hran neiin kum 20 chhung kan kal a ni," a ti a; MNF-te'n zalenna an sualzia chu India sorkarin a hre chiang hle niin a sawi.

Chief Minister chuan, kum 10 opposition-a an awm chhungin thil tam tak an zir nia sawiin, "Kan sorkar leh hnuah malsawmna kan dawng nasa hle. Assam Rifles sawn chhuah chungchangah building peihfel a nih vek hnuah pawh Congress sorkar kum 10 chhungin hmalakna a awm lo. Thla hnih vel kan sorkar chiah a, May 31 hmaa insawn tura tih an ni. Prime Minister, Home Minister leh Ministry of Home Affairs lamah kan sawi ngun lutuk a, an ning vete pawh a ni ang, kan sorkar chiah a, sawn chhuah turin an ti nghal a ni," a ti.

Lalpa rawngbawl duh ram leh hnam chu an dingchhuak dawn tih sawiin MNF President chuan, "Lalpa rawngbawl hi kan tum a ni a, kan dingchhuak ang. He party leh hnam movement tluka harsatna tâwk tam an awm lo a, Mizoram a buai tak tak kha chu a aia ram buai a awm lo. Remna kan neih leh hnu chuan remna nei ṭha ber kan ni," a ti a; MNF-te chu Pathianin a hruai zel ṭhin thu a sawi.