INTACH-in Dawrpui biak-in an tlawh

INTACH, Mizoram Chapter hruai­tute chuan nimin zing khan an convener P Rohmingthanga hoin Dawrpui biak-in an tlawh a, Dawrpui Kohhran hruaitute nen inkâwmin, biak-in hlui zawk humhalh zui dan tur an sawiho.

INTACH tarlan danin, kum 5/6 vel kal taa Dawrpui Kohranin an biak-in, kum 1931-a Pu Mena hoa sak chu sak ṭhat an tum a, chu chu hriain INTACH hruaitute chuan Dawrpui Kohhran hruaitite kâwmin, an biak-in hlui chu tihdanglam lo leh ṭhiat lo tur leh, a tira sak dan anga siam ṭha (restore) zawk turin an ngen a ni.

Dawrpui Kohhran chuan an biak-in hlui chu ṭhiat lohin biak-in thar sak an remti a, biak-in hlui pawh chu a tìra sak ang (original) thei ang berin an siamṭha zui a ni. Pulpit pawh a thar siam loin a hlui, a tìr aṭanga an lo hman ṭhin chu an biak-in hluiah chuan an hmang ta zel a, lungbang leh darthlalang rawng neite pawh an vuah leh bakah, ṭhutthleng hlui, thing kher khuarte pawh an la dahṭha bawk.

INTACH convener P Rohmingthanga chuan, Dawrpui biak-in hlui zawk chu Mizorama biak-in hlui ber leh mawi ber a ni tawh tih sawiin, "Tunah chuan kan heritage biak-in neih chhun a ni a, khualzinte tan pawh hmun pawimawh a la nih kan beisei. A kawt zawl pawh hi biak-ina innei hlimte tan phei chuan thlalak nan a îtawm khawp mai," a ti.

P Rohmingthanga chuan, Mizorama hmanlai in hlui leh pi leh pute kutchhuak tam tak hloh a ni tawh tih sawiin, "Kan biak-in tam ber pawh kan sak thar deuh vek tawh avangin kan hloh vek tawh a ni," a ti a; chutih laia Dawrpui Kohhranin an biak-in hlui an la humhalh zel chu lawmawm an tih thu a sawi.