Ramri-ah kan him lo nasa - ZPM MLA

ZPM MLA VL Zaithanzama, Aizawl West-III bialtu chuan nimin khan ZPM pisaa inkhawmah thu sawiin, "Mizoramin rei tak ram hruaitu ṭha kan neih loh avangin ramrîah kan him lo nasa tawh a, kan sakhuana thlengin a nghîng mek a, kil tin aṭangin beih kan tawhin hneh lotuah kan ṭang zel a ni," a ti a; Mizoram dinhmun dik tak hriat chian a ṭul thu a sawi.

VL Zaithanzama chuan, kohhran hrang hrangin kum kal taa an member-te thih dan media-a a lan danin, mitthi zinga 90% vel chu mipa an ni. Ramriah chauh ni loin, ram chhungah pawh hnam a him lo. Vote nei zingah chauh pawh hmeichhia aiin mipa sing hnih laiin an tlem a, hei hian hnam himna a tiderthawng a ni," a ti.

Ram hruaitu Pathian ṭihna tak takna nei lo leh hruaitu ṭha lo chuan ram an hruai ṭha thei lo a, mipuiin an tuar ṭhin tih sawiin, "Pathian hremna chu hnamin a tuar ṭhin. Kan ram damlo leh him tawh lo, tluchhe mek dam lehna tur chuan ram hruaitu ṭha, Pathian ṭih mi kan thlan chhuah a hun tawh," a ti a; Pathian ṭih mi thlang chhuak turin mipuiin tun aṭanga ngaihtuahna an sên a ngaih thu a sawi.

VL Zaithanzama chuan, "Pathianin min pek kan ram tualṭo mau hnualsuat a, a ṭha dawn nge dawn loh tih hriat hauh loh ram dang ami chin tum phet hi thil pawi a tling thei. Sim atan a ṭha hle a ni," a ti a; CADC huam chhungah Mizo fate ngeiin in hmun, lo, ram an nei ve thei miah lo chuan a rilru a tihnat thu sawiin, "Kan ram leh hnam, kan Kristianna humhim tur hian Central duh dan apiang zawm kher a ṭul lo. Kan dikna vawng nung thar leh tur hian huaisen takin Zo fate hi i ding ang u," a ti bawk.

ZPM thuchhuah chuan, nimina an pisaa inkhawmah hian ZPM zawm thar ukil 11 leh dan zirlai mi pahnihte ZPM chairman Lalliansawta'n a lawm lut tih a tarlang.