World Hearing Day hman a ni

Nimin March 4 kha khawvel puma beng hriatna lam inzirtirna ní, World Hearing Day a ni a, Mizoramah pawh National Prog­ramme for Prevention and Control of Deafness (NPPCD) hmalaknain district hrang hrangah hman a ni.

World Hearing Day 2019 hi Health department-a district pakua zingah - Aizawl East leh Aizawl West, Champhai, Ma­mit, Lunglei, Serchhip leh Kola­sib district-ahte hman a ni a; zing karah damdawi-in hotu te, ENT department leh NPPCD-a thawkte'n YMA, kohhran ṭhalai pawl leh sikul naupangte nena thawk hoin rally an buatsaih.

Chhûnah kumina Woerld Hearing Day thupui 'Check your hearing' (I beng hriatna enfiahtir rawh) tih thupuia hmangin district hospital tin OPD-ah aware­ness campaign neih a ni a; mithiamte'n beng enkawl dan leh bengngawnna laka fihlim theih dan turte an zirtir bakah, khawl hmanga beng entirna hrang hrangte chu a thlawn vekin an tihsak a ni.

World Hearing Day puala beng ṭha lo inentir zawng zawngte chu mi 165 an ni a, beng ṭha tawk lo, ri hriatna ṭha lo (hearing loss) mi 75 hmuh chhuah thar an ni.

NPPCD hi National Health Mission (NHM) hnuaia awmin, kum 2014-ah Mizoramah kalpui ṭan a ni a, tunah hian Lawngtlai district leh Siaha district tih lohah chuan kalpui vek a ni tawh.

Health department tarlan danin, NPPCD hmalakna hnuaiah hian kum 2018-19 chhungin beng lama insawiselna nei mi 23,000 an inentir a; beng natna hmuh chhuah zat 13,000, beng ri hriatna ṭha lo hmuh chhuah zat 3,000, NIOH lama beng dár vuah tura tih mi 1,000 leh beng zai 140 an awm a ni.