CAB pass a nih lohna tur ka nawrnaah Mizoram background thlir turin ka ti - Chief Minister

Chief minister Zoram­­thanga chuan, The Citizenship (Amend­ment) Bill, 2016 (CAB) pass a nih lohna tura sorkar laipui hotute a nawrnaah, Mizoram background thlir turin a hrilh niin a sawi.

Nimina Mizo Hnam Rûna Mizo National Day an hmannaah thu sawiin Chief Minister chuan, CAB chungchanga Union Home Minister a kawmnaah secretary rualte'n hnial khân an ngah hle niin a sawi a, "CAB chungchangah Mizoram background thlir a ngaih thu ka sawi a, Mizoram background-te ka sawi hnu chuan hnial khân thiam tak tak secretary-te pawh an ngawi hmak a ni," a ti.

Zoramthanga sawi danin, Mizoram chu India ramah a awm ngai lo a, kum 1947-a India a independent khan British an chhuah tâk avangin Mizoram awm zel dan turah ngaihdan panga a awm a, chungte chu - Bristish hnuaia crown coloney-a awm, India hnuaia awm, Pakistan zawm, Burma zawm leh independent a ni.

India independent hun lai chuan Mizote an la mâwl avangin India sorkarin an constitution hnuaia awm turin Mizote an barh lui tih sorkar laipui hotute a hrilh nia sawiin Zoramthanga chuan, "Chu chu duh loin independent pawh puang kan ni. India rama Mizo­ram tel an duh chuan Mizoram leh Mizote inhumhimna dah turin kan ti a, an dah hnuah India ramah kan tel ve chauh thu ka thlen a ni," a ti.