PWD-ah PRO dah thar tum

PWD engineer-in-chief thar K Lalsawmvela chuan, mipuiin PWD hnathawh leh hmalakna an hriat zung zung theihna turin website ṭha taka update an tum thu a sawi a, "Public reletions officer (PRO) pawh indah kan tum dawn a ni," a ti.

K Lalsawmvela hian nimin khan R Vanlal­tluanga thlakin PWD E-in-C hna a zawm a, nimin vek khan a pisa luah ṭanin, amah lawmna inkhawm PWD conference hall-ah buatsaih a ni. K Lalsawmvela chuan, thingtlang khuaa lo neitu fapa a nih thu sawiin, "Rambuai vangin kum kua lai ka rammu ve a ni. Kum kaw hnuah lehkha ka zir zawm leh a, hetiang dinhmun ka thleng hi Pathian malsawmna liau liau a ni," a ti.

Hun eng emaw chen aṭanga PWD chu kawng chungchangah social media hrang hrangah a hmingchhe hle tih sawiin PWD E-in-C chuan, "Hmasawn theih dan tur leh hnathawktu tam zawk pawh ngaihtuah tum a ni," a ti a; thawktute chu finchhuah zel turin mipui a ngen a ni.