NH-302 siamah thawk chak lo bik an awm

Tlabung leh a chhehvel khaw mipuite châk lâkna, National Highway no. 302 thawm ṭhat hna thawh turah 70% vel zawh a ni tawh. Hetih lai hian, kawng thawm ṭhat hna thawktu contractor pathum zingah Vinco Constructions-in an thawh turah 24% chiah an la thawk zo thung.

Ministry of Road Transport & Highway sum sênga thawm ṭhat mek NH-302 hi hlawm thumah ṭhen a ni a; L&T Constructions, Vinco Constructions leh GP Projects Ltd.-ten an thawk. L&T hian an thawh tur chin an thawh zawh tawh laiin, GP Projects Ltd. chuan 98% vel an zo tawh a; Vinco Constructions erawh chuan 24% chiah la thawk zoin, 76% thawh hmabak an la nei a ni.

Vinco Constructions-ten hna an thawh chak tawk loh avangin khualzinte'n harsatna an tawh phah tih Tlabung  aṭanga thudawnna chuan a sawi a; ruahtui a tlak chuan harsatna nasa zawk tâwk thei dinhmuna an din thu avangin, kumin fûrpui thlen hma ngeia chak zawka hna thawk turin mipuiin Vinco an phût tih a sawi.

Vinco Constructions bik hi March 31, 2019 ral hmaa an hna thawk zo tura tih an ni a; km. 30-60 inkar, km. 30-a thui kawng thawm ṭhatna tura sum awm zat chu cheng vbc. 17.91 a ni.