Vanglaini Zirchianna : Mi 7 hnenah vawk vulh ṭanpuina Cheng nuai 304.11 pek a ni

Animal Husbandry & Veterinary depart­ment chuan kum 2018-19 chhung khan mi pasarih hnenah vawk vulh ṭanpuina cheng nuai 304.11 an pe a; ṭanpuina hlâwm lian an pek zingah pekna tur hmun ni loa mi pahnih an tel.

Vanglaini-in RTI Act, 2005 hmanga a zawhna AH&Vety department-in an chhannaa a lan danin, vawk vulh ṭanpuina hi kum 2018-'19 khan mi pasarih hnenah pêk a ni a; ṭanpuina pek hnuah a dawngtute'n vawk an hralhna leh a notê an hralhna man (rate) erawh department-in an hriatpui lo.

Vawk vulh ṭanpuina pek dan tehfungah Nghalchawm/ Lengte-ah ram an nei ngei tur a ni, tih a tel a; mahse, farm pahnih chu Nghalchawm/ Lengtea ram nei lo, hmun danga mi an ni.

Project ang loa kalpui chu agreement tihtawp (cancel) thlenga action lak tur a ni a, a hlâwkna (net profit) aṭanga 5% pawh kum tinin department-ah chhûn luh tur a ni bawk.

AH&Vety department-in vawk vulh ṭanpuina an pek tam ber chu R Lalengmawia, OM Piggery Farm, Durtlang a ni a, cheng nuai 90 pek a ni.

Ṭanpuina dawng tlem ber pahnihin cheng nuai 30 ve ve an dawng. Ṭanpuina sum chu NEDP aṭanga pêk a ni.