Health Minister-in Lengpui Airport a tlawh

Tun hnaia Covid-19 hluar thar leh avangin Health minister Dr R Lalthangliana chuan April 10, Inrinni khan Lengpui Airport a tlawh a, hripui laka invenna kalpui dan a enfiah.

Health Minister chuan, Covid-19 vei an pun zel chuan Aizawl khawpuia random sampling test (Kiosk) Bawngkawn South, Chawlhhmun leh Dinthar awm sate chu tihbelh a, hmun dang pali velah bun belh ṭha a tih thu a sawi a, "Hemi chungchang hi meeting leh hunah rêl a ni ang," a ti.

Lengpui Airport-a thawkte'n tun kar aṭangin thlawhtheihna lian pali vel ni khatah an rawn ṭum dawn a, mi 500 aia tlem lo an lo thlen ṭhin dawn avangin Covid-19 laka invenna atana hmalakna kawngah duty an indaih loh tur thu an sawi a; chumi chungchangah chuan Minister chuan, mi dang an tirh belh theih tur thu a sawi.

Lengpui leh Aizawl inkara taxi tlân ṭhinte chuan Health Minister hnenah hian passenger-te an lirthei hma (front seat)-a chuantir an duh loh thu leh bungrua pawh passenger-te'n taxi-ah inhlân se an duh thu an lo thlen a ni.

Health Minister hi Health secretary R Lalramnghaka, Health Services director Dr Lalchungnunga, NHM mission director Dr Eric Zomawia, NHM state nodal officer Dr Pachuau Lalmalsawma leh official dangte'n an ṭawiawm.