PAHOSS kalpui a ni zel dawn - Dy. CM

Urban Development and Poverty Alleviation (UDPA) department changtu deputy chief minister Tawnluia chuan, Parking House Support Scheme (PAHOSS) chu la kalpui zel a nih dawn thu a sawi.

Vanglaini palai zawhna chhangin Dy. Chief Minister chuan, kum 2021-22 Mizoram budget-ah PAHOSS atan sum dah ni lo mah se, PAHOSS chu chawlhsan a ni dawn tihna a ni lo tih a sawi a, "Sorkar kum liam taa hman zawh hman loh eng emaw zat a la awm a, chumi hmang chuan PAHOSS hi kalpui zel a ni dawn. Sum awm sa a zawh hunah chuan ngaihtuah leh a ni dawn a, Chief Minister nen pawh kan sawi dûn a ni," a ti.

Chief Minister-in PAHOSS a duang chhuak chu fakawm a tih thu sawiin Tawnluia chuan, "He scheme hi thil ṭha tak a ni a, a puitlin hunah chuan traffic jam eng emaw chen a chhâwk zângkhai dawn a ni. Mipui tan thil ṭha tak a ni a, loan pawh ni loin, a thlâwnin sum an dawng a ni," a ti a; a dawngtute'n ṭha taka an tihhlawhtlin ngei a beisei thu a sawi.

Dy. Chief Minister chuan, PAHOSS diltute chu uluk takin an hmunhma endik vek a nih thu leh a dawng tur fimkhur taka thlan a nia sawiin, "A dawngtu tur thlanna committee-ah ka tel lo a, official vek an ni. Diltu an awmin an hmunhma uluk taka endik a ni ṭhin. PAHOSS dawngtute hian an kalpui ṭha tlangpui a, first instalment dawng tawh ti ṭha lo an awm chuan kan pe chhunzawm lo ang," a ti.

Aizawl khawpui laili kawng­pui dunga awm zingah PAHOSS dil an tam lo nia sawiin Tawnluia chuan, "Aizawl khawpui a ṭhang chak em em a, tuna hmun laili lo zawka kan ngaihte pawh kum 5-10 ah chuan a lûn tawh hle ang. Chumi thlír chung chuan hmun laili lo deuha ngaihte pawh pek an ni," a ti a; tun hma aṭangin PAHOSS chu lo kalpui tawh ni se, Aizawl khawpui lailia traffic tâwt lutuk pawh a ziaawm tur thu a sawi.