TPF bànte lâk leh vek tum a ni

Dampa Tiger Reserve véngtu Tiger Protection Force (TPF)-te chu an hna aṭanga bàn an nih hnuah a thara lak leh tura tih a ni a, bàn tawhte chu sorkarin lâk leh vek a tum nia thu dawn a ni.

Dampa Tiger Reserve hotute hnen aṭanga Vanglaini-in thu a dawn danin, TPF-te chu chhawk ṭhen awm loin interview apiang chu lâk an ni dawn niin a sawi a, "Sum lamah harsatna kan tawh dawn avangin a luhaithlak dawn hlein kan hria," a ti.

Nikumah sorkar laipui aṭangin TPF zawng zawng hlawh tur daih sum an dawng lo tih sawiin Tiger Reserve hotute chuan, "April-September daih chauh kan hmu. Sorkar kum tharah pawh nikum lam aia tam dawn kan beisei lo. Chuvangin, a thawkte tihtlem kan tum a, mahse, lungawi lohna an lantir avangin chhawk ṭhen awm loin, interview tura inlante chu lâk vek mai ni se kan ti leh ta a ni," tiin a sawi.

Environment, Forest & Climate Change (EFCC) department hotute chuan, reserve tihchangtlunna tura sum hmuh leh thawktute hlawh tura sum hmuhte chu a inan loh thu sawiin, "Hna an thawk reng si a, TPF-te hlawh tur a awm si lo, tia sawi a awm. Sum head a inan loh avangin reserve tihchangtlunna tur hi hnathawkte hlawhah a lâk ṭhen theih loh a ni," an ti. Eng emaw vanga bàn ṭhen an neih zauh zauh avangin tunah chuan TPF 160 vel an awm mek thu ansawi bawk.

Tarlan tawh angin, TPF-te hi Centrally sponsored scheme hnuaia thawk an ni a, an hlawh tur chu sorkar laipuiin 90% a tum a, Mizoram sorkarin 10% a tum ṭhin a ni.