Kum liam taah thisen pêk a tlahniam : 2020-21 chhungin unit 26,658 pek a ni

Sorkar kum liam ta, April 2020 - March 2021 chhung khan Mizoramah thisen unit 26,658 pek a ni a, chu'ng zinga unit 23,911 chu pek bik nei loa a thlawna pek (voluntary donation) a ni. Kum 2020-21 chhunga thisen pek hi kum 2018-19 leh kum 2019-20 chhunga pek zat aiin a tlem zawk.

Mizoram State AIDS Control Society (MSACS) chhinchhiah danin, kum 2020-21 chhunga thisen a thlawna pek unit 23,911 chu pek zawng zawng zat unit 26,658 aṭangin 89.70% a ni a, pek bik neia pek (replacement) unit 2,747 (11.30%) a awm. Mizoram pumah blood donation camp ṭum 530 a awm a, chu'ng aṭang chuan thisen unit 15,277 (57.31%) pek a ni.

Mizorama blood bank 11 zinga thisen dawng tam ber Civil Hospital, Aizawl tan thisen unit 13,222 pek a ni a, a dawng tlem ber Zoram Medical College (ZMC)-ah unit 195 chiah pek a ni. ZMC-in thisen an dawn zawng zawng chu voluntary donation (100%) a ni a; Synod Hospital-ah chuan pek zawng zawng unit 2,777 zinga unit 1,826 (65.75%) chu a thlawna pek niin, voluntary donation hniamna ber a ni.

Kum 2020-21 chhunga Mizorama thisen pek zawng zawng unit 26,658 hi kum 2018-19 chhunga pek zat unit 27,079 aiin 421-in a tlem zawk a, kum 2019-20 chhunga pek zat unit 30,448 aiin 3,790-in a tlem zawk bawk. Association for Voluntary Blood Donation (AVBD) president C Lalnunnema chuan, kum 2020-21 chhunga Mizorama thisen pekin kum hmasa lama pek zat a phâk loh chhan chu Covid-19 hripui léng leh hun rei tak inkhàrkhip vang nia an ngaih thu a sawi.

AVBD President chuan, kum 2020-21 chhunga a thlawna thisen pek zat tura target an siam 90% chu tling lo deuh mah se, hripui léng leh inkhàrkhip vanga chêt a harsat dan ngaihtuahin, a ṭha thawkhata an ngaih thu a sawi a; kum 2021-22 chhung atan pawh target 90% bawk an siam tih sawiin, chumi tlin ngei tur chuan thisen pek uar zel turin Mizo mipui a sáwm a ni.