KHAWTHLIR

Chhawmdawlna hlân
LPS Vision leh ZONET Cable TV-te'n March 27, 2021 zana LPS Studio-a Myanmar ráltlânte chhawmdawlna tura Liberty for Myanmar Charity Concert an buatsaih aṭanga sum an hmuhte chu April 10, Inrinni zan khan ZONET Studio-ah hlanna inkhawm an buatsaih a; NGO United for Democratic Myanmar (UDM) leh Central YMA hnenah an hlân. Chhawmdawlna sum hi a vaiin Rs. 23,17,200 an hmu a; Mizorama rawn ráltlânte chhawmdawlna atan UDM leh CYMA hnenah Rs. 10,00,000 ve ve hlanin, Myanmar ram chhunga Zo hnahthlakte ṭanpuina atan UDM hnenah Rs. 13,17,200 an hlân a ni. CYMA hnena Rs. 10,00,000 hlan chu YMA branch kaltlangin ráltlân dawngtu chhungkuate hnenah pek tur a ni. Vanlalsailova kaltlanga mi eng emaw zatin sum an thawh khawm pawh NGO UDM hnenah hlan nghal a ni.

Thisen pe
April 10, Inrinni khan Falkawn Branch YMA chuan ZMC blood bank-ah thisen unit 59 an pe a, petute mipa 48 leh hmeichhia 11 an ni. KṬP, Bawngkawn Bial pawhin Synod Hospital tan thisen unit 55 an pe a, a petute mipa 44 leh hmeichhia 11 an ni.

Save Chite Lui
Presbyterian Kohhrana Aizawl Central Presbytery rorel bawhzuiin Inrinni khan Electric Veng Pastor Bialin Electric Veng Kohhran hall-ah 'Save Chite Lui Seminar' an buatsaih a, Save Chite Lui Coordination Committee hruaitute'n hun an hmang. Seminar-ah hian Electric Veng biala kohhran, Kohhran Hmeichhia, KṬP leh Kohhran Pavalai Pawl hruaitute bakah, local council, YMA leh MHIP hruaitute an tel a ni.

Kawng hawng
April 10, Inrinni khan Lunglei High Powered Committee vice chairman Lawmawma Tochhawng, MLA chuan MLA fund Rs. 1,00,000 leh Zawlnei Darphawka tu leh fate sum thawhkhawm hmanga siam, zawlnei Darphawka thlàn panna Dawn-Baichi kawng, km. 5.5-a thui chu a hawng. Kum 1985 khan Baichi hmunah zawlnei Darphawka ruhro laih chhuah a ni a, kum 1988 khan a thlàn lung phun a ni.