COVID-19: Mizoram dinhmun Hri vei enkawl lai 137 an awm

April 9, Zirtawpni khan Mizoramah Covid-19 vei mi 25 hmuh chhuah a ni a, Inrinni khan mi 29 hmuh belh leh a ni. Inrinni leh nimin khan mi pasarih chhuahtir an ni a, nimin tlai dar 5 thleng khan enkawl mek mi 137 an awm.

Covid-19 vei Zirtawp­nia hmuh chhuah mi 25-te chu ZMC laboratory-a hmuh mi pakhat, TrueNAT-PCR hmanga hmuh mi pakhat leh RAT hmanga hmuh mi 23 an ni a; Inrinnia hmuh tharte chu ZMC-a hmuh mi pathum leh RAT hmanga hmuh chhuah mi 26 an ni.

Tun hnai ni li (April 7-10) chhungin hripui vei mi 104 hmuh chhuah a ni a, chawhrualin ni tin mi 26 hmuh belh an awm ang a ni.

Inrinni khan hripui laka fihlîm tawh pakhat chu SRH-ZMC aṭangin chhuahtir a ni a, nimin khan Durtlang BSUP CCC aṭangin mi paruk an chhuak leh bawk. Mizoramah Covid-19 vei mi 4,612 hmuh chhuah a ni tawh a, mipa 3,328 leh hmeichhia 1,284 an ni. Nimin tlai dar 5 thleng khan mi 4,464 (96.79%) chhuahtir an ni tawh a, mi 11 (0.24%) thi tawhin, enkawl mek mi 137 (2.97%) an awm.

April 9, Zirtawpni khan ZMC laboratory-ah swab sample 35, TrueNAT-PCR hmangin Lungleiah sample pathum leh RAT hmangin district pakuaah sample 747 endik a ni a; sample endik zawng zawng chu 785 niin, chu'ng aṭanga hripui vei hmuh 25 chu 3.20% a tling.

Hripui vei Zirtawpnia hmuh chhuah mi 25 zinga mi 12 chu Mizoram chhunga kái nia hriat niin, mi 13 chu tun hnaia state páwn aṭanga rawn lut an ni a, tualchhunga kái zingah kàina hriat loh mi 10 an awm a; natna (symptom) lang mi 11 an awm.

Inrinni khan ZMC-ah sample 20, TrueNAT-PCR hmangin Lunglei leh Serchhipah sample 18 leh RAT-in district pakuaah sample 1,544 endik a ni a; sample endik zawng zawng chu 1,582 niin, chu'ng aṭanga hripui vei hmuh 29 chu 1.83% a ni.
Covid-19 positive Inrinnia hmuh chhuah mi 29 zinga mi 23 chu Mizoram chhunga kái nia hriat niin, mi paruk chu tun hnaia state páwn aṭanga rawn lut an ni a, tualchhunga kái zingah kàina hriat loh mi 20 an awm a; natna lang chhuak mi 16 an awm.

Mizorama district 11 zingah hripui vei mek awm lohna district pathum chiah (Siaha, Saitual leh Khawzawl) a awm rih a ni. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,672 hmuh chhuah a ni tawh a, TrueNAT-PCR hmangin 682 leh RAT hmangin 1,257 hmuh chhuah a ni tawh.
April 10, 2021 thlengin Mizoramah swab sample 2,62,310 endik a ni tawh a, chu'ng aṭanga Covid-19 positive hmuh tawh zat 4,612 chu 1.76% a ni. Hripui vei hmuh tawh zinga mi 2,158 chu Mizoram chhunga kái chhâwng an ni a, mi 2,400 chu Mizoram páwn aṭanga an rawn luh hnua hmuh chhuah an ni thung.

Covid-19 vei hmuh chhuah tharte
APRIL 9, 2021-A HMUH CHHUAH
ZMC-a hmuh chhuah:
Zuangtui - 1: Hmeichhia kum 34, April 6-a Delhi aṭanga haw, ina inkhung lai, symptom nei.

TrueNAT-PCR-a hmuh:
Serkawn - 1: Mipa kum 34, March 26, 2021-a Shillong aṭanga haw, symptom neih vanga sample endik.

RAT hmanga hmuh chhuah:
Leite - 1: Hnam dang mipa kum 37, Haryana aṭanga kal, LRAR Infra. hnuaia thawk, Lengpui Airport-a hmuh chhuah, symptom nei lo.
Ṭhuampui - 2: Nupa kum 33 & 37, Maharastra aṭanga kal, Lengpui Airport-a hmuh chhuah, symptom nei lo.
Chawnpui - 1: Mipa kum 15, Delhi aṭanga haw, Lengpui Airport-a hmuh chhuah, symptom nei.
Laipuitlang - 2: Hmeichhia kum 11 & 39, Jharkhand aṭanga kal, Lengpui Airport-a hmuh chhuah, symptom nei ve ve.
Tuikhuahtlang - 1: Hmeichhia kum 18, Mumbai aṭanga haw, Lengpui Airport-a hmuh chhuah, symptom nei.
Damveng - 2: Hmeichhia pahnih kum 29 & 51, tualchhunga kái, kàina hriat, pakhatin symptom a nei.
Bethlehem Veng - 1: Mipa kum 42, dam lohna vanga damdawi-in pan, screening point-a hmuh chhuah, kàina hriat loh.
Zarkawt - 2: Mipa kum 42 & 6, pafa, fimkhur thila private hospital-a sample endik, symptom nei lo ve ve.
Central Jail Veng - 1: Mipa kum 52, private hospital-a hmuh chhuah, hri kàina hriat loh, symptom nei lo.
Darlung - 1: Mipa kum 22, private hospital-a hmuh chhuah, hri kàina hriat loh, symptom nei lo.
Bungkawn Vengthar - 2: Hmeichhia kum 52 & 61, private hospital-a hmuh chhuah, hri kàina hriat loh, symptom nei lo ve ve.
Dawrpui Vengthar - 1: Hmeichhia kum 34, private hospital-a hmuh chhuah, hri kàina hriat loh, symptom nei lo.
Zuangtui - 1: Mipa kum 33, private hospital-a hmuh chhuah, hri kàina hriat loh, symptom nei lo.
Champhai Venglai - 1: Hmeichhia kum 53, symptom neih vanga sample endik, hri kàina hriat loh.
West Phaileng - 2: Hmeichhia kum 4 & 38, nufa, April 1-a Jharkhand aṭanga haw, symptom nei ve ve.
Zochachhuah - 1: Hnam dang mipa kum 38 & 52, Chandigarh aṭanga kal, KMMTP siamnaa thawk, symptom nei lo ve ve.

APRIL 10, 2021-A HMUH CHHUAH
ZMC-a hmuh chhuah:
Ramhlun North - 3: Hmeichhia kum 24, 27 & 30, hri vei tawh nen inkungkaih vanga ina inkhung lai, symptom nei lo vek.

RAT hmanga hmuh chhuah:
Aizawl Venglai - 1: Hmeichhia kum 52, Delhi aṭanga haw, Lengpui Airport-a hmuh chhuah, symptom nei.
Bawngkawn - 1: Hmeichhia kum 43, Kolkata aṭanga haw, Lengpui Airport-a hmuh chhuah, symptom nei.
Lunglei - 3: Hmeichhia kum 33, 40 & 55, Delhi aṭanga haw, Lengpui Airport-a hmuh chhuah, symptom nei 1 & nei lo 2.
Bethlehem Veng - 11: Mipa kum 6, 16, 21, 32 & 76 leh hmeichhia kum 12, 32 & 40; inrinhlelh vanga private hospital-a sample endik, hri kàina hriat loh vek; symptom nei 7 & nei lo 4.
Kanan Veng - 4: Mipa kum 34, 42, 64 & 76; inrinhleh vanga private hospital-a sample endik, hri kàina hriat loh vek; symptom nei 2 & nei lo 2.
Chawnpui - 2: Mipa kum 40 & hmeichhia kum 42; inrinhlelh vanga private hospital-a sample endik, hri kaina hriat loh, symptom nei lo ve ve.
Vaivakawn - 1: Mipa kum 46, inrinhlelh vanga private hospital-a sample endik, hri kaina hriat loh, symptom nei lo.
Champhai Ruantlang - 1: Hmeichhia kum 24, April 6-a Delhi aṭanga haw, Aizawl a thlen hnua symptom a neih vanga private hospital-a sample endik.
Damveng - 1: Mipa kum 54, hri vei nena inkungkaihna nei, symptom nei lo.
Bawngkawn - 1: Hmeichhia kum 43, symptom neih vanga private hospital-a sample endik, hri kàina hriat loh.
Zemabawk - 1: Hnam dang mipa kum 27, 225 Bn CRPF mi, April 5, 2021-a Madhya Pradesh aṭanga rawn lut, symptom neih vanga private hospital-a sample endik.
Falkawn - 1: Hmeichhia kum 31, SRH-ZMC OPD-a hmuh chhuah, hri kàina hriat loh, symptom nei.
Kanhmun Screening - 1: Mipa kum 27, Karimganj aṭanga rawn lut, symptom nei lo.