Covid-19 inkaihhruaina thar tlangpui

Mizoram sorkara Disaster Management & Rehabilitation department chuan Mizoramah Covid-19 vei an pun leh tâk avangin April 9, Zirtawpni zan khan inkaihhruaina, Standard Operating Procedure (SOP) thar a tichhuak a, hman nghal a ni.

SOP tharah hian, district khawpui zawng zawngah zan dar 8:30 leh zing dar 4 inkarah páwna chhuah phal loh (curfew) tura tih a ni a; chumi ang chuan district magistrate-te'n an district ṭheuha hman turin April 10, Inrinni khan thupek an chhuah.

Inkaihhruaina thar leh curfew hman hun chhung tur bituk a awm lo a, inkaihhruaina/thupek thar a awm leh hma chuan kalpui tur a ni.

SOP thara pawimawh zualte
• District khawpuiah zan dar 8:30 leh zing dar 4:00 inkarah páwna chuah phal a ni lo.
• Zanah inkhawm phal a ni lo.
• Inkhawmnaah zaiho leh hla sak phal a ni lo. Hei hian solo, duet, trio leh quartet-te pawh a huam.
• Inkhawmnaah ṭhutnaa leng zat zatve (50%) aia tam tel phal a ni lo.
• Chhiatni/ṭhatni-ah ei leh in siam/sem loh tur.
• Middle school chin hnuai lam sikul kài rih loh tur a ni a, online-in zirna kalpui tur.
• May 4, 2021 aṭanga sikul luh ṭan tura ruahman tawh chu sût a ni.
• State páwn aṭanga Mizorama lutte an rawn luhna (point of entry)-ah RAT hmangin swab test tih vek tur a ni a, negative-te chu fimkhur takin, mi dang nena awmho loin ni sarih chhung an inkhung hrang tur a ni. RT-PCR/TrueNat-PCR test negative-te chu inkhung a ngai lo.
• Minister-te public interview khâr rih a ni.
• District khawpuiah dawr, hotel, restaurant leh sumdawnna hmun dangte chu zan curfew ṭan hun bawh buai lo tura hawn theih a ni.

Aizawla zan curfew-in a huam lote
1. Covid-19 task force hrang hrang member-te
2. Army, BSF, CRPF, Assam Rifles leh BRTF duty
3. Magistrate, Police leh Home Guard duty-te
4. Damdawi-ina thawkte
5. Chanchinbumi leh electronic media-a thawkte
6. Petrol pump-a zan lam thawkte
7. Fire & Emergency Services duty
8. Power & Electricity hnuaia power supply buaipuitute
9. Prison duty
10. Excise & Narcotics enforcement mite
11. Rîkrum thila damdawi-in pantu leh chhungkuaa thihna vanga veng danga kal ngai, an veng LTF/VTF lehkha neite
12. Private security service
13. Essential commodity phur leh Home department aṭanga phalna neite
14. Disaster management buaipuitu official-te
15. PHE department-a emergency leh night duty-te
16. IPR department official night duty-te
17. Kohhran hruaitu, kohhran thil pawimawha kohhran lirtheia chhuakte
18. General Reserve Engineer Force mite
19. District Magistrate leh Sub-Divisional Magistrate-in phalna an pekte