Armed Venga vawk hri léng sawiho
Tun hnaia Aizawla vawk hri léng vanga infected area-a puan, Armed Venga vawk vulhtute chu April 10, Inrinni khan bialtu MLA Robert Romawia Royte hoin AH&Very department mithiamte nen Armed Veng community hall-ah an inkâwm a; vawk hri léng laka invènna tur leh hmalak dan tur an sawiho.
Robert Romawia Royte chuan, hun rei lote chhunga Armed Venga vawk 25 chuang a thi nghal chu pawi a tih thu sawiin, "Vety Minister leh Vety Board Vice Chairman-te ráwnin emergency meeting koh a ni a, vawk hri léng hi hri hlauhawm chi nia mithiamte'n an rin avangin veng mipuite'n Vety department mithiamte kaihhruaina kan zawm a pawimawh," a ti a; vawk hri do nana department-in a bial chhunga hma an lâknaah theihtawp chhuahpui a tum thu a sawi.
AH&Vety joint director Dr Lalnghinglova chuan, vawk hri léng chu African Swine Fever a nih an rin thu a sawi a, "ASF vei chu an thi ngei tura ngaih a nih avangin a ṭâi darh loh nan fimkhur taka vawk enkawl a ṭul," a ti.
Inkawmnaah hian Armed Veng, Chhinga Veng, Armed Veng South leh Chite Veng LC chairman-te leh tlawmngai pawl hruaitu te, vawk vulhtute an tel a; AH&Vety Polyclinic joint director Dr Lalthankima, Polyclinic Hospital chief veterinary officer Dr PC Lalrokima, DVO Dr Lalnghinglova leh veterinary officer Dr Lalbiaknungi ten vawk vulhtute chu vawk hri chungchang an hrilhfiah bakah, zawhnate an chháng a ni.