Specialist doctor an tlem hi a manganthlak - Health Minister

Mizorama damlo zai ṭhin doctor inzawm khawm pawl, Association of Surgeons of Mizoram (ASM) chuan April 10, Inrinni khan Aijal Club-ah inkhawmpui an hmang a; khuallian Health minister Dr R Lalthangliana chuan, Mizorama specialist doctor an tlem chu manganthlak a tih thu a sawi.

Dr R Lalthangliana chuan, damlote tana inpe zo tak leh hmasawn tum doctor rual intél khawm an awm chu thlamuanthlak a tih thu sawiin, "Mipui hriselna leh enkawl dam kawngah awmze nei leh ṭangkai takin ke pên zel ang che u," a ti.

Khawvel ṭhang zelah inzir zel tura chahin R Lalthangliana chuan, "Pathianin duh taka a siam mihringte enkawl dam hna thawktu in ni a, in mawhphurhna a sang hle," a ti a; natna chi hrang hrang bakah damdawi leh kháwlte a inthlâk ve zel avangin eng lai pawha inzir reng a ṭul thu a sawi.

Health Minister chuan, Mizoramah specialist doctor an tlem chu manganthlak a tih thu sawiin, "Natna chi hrang zinga specialist doctor kan neih lohna leh kan neih tlem zualnate hi engtianga phuhrûk tur nge tih ngaihtuah a ngai tak zet a, kan doctor neih sate pawh specialist ni tura ṭan in lâk a ṭul a ni," a ti.

ASM hi kum 2018-a din a ni a, member 34 awm mekin, an zinga pali chuan Mizoram páwnah super speciality/MCh an zir mek a ni.