Dan loa thil lâk luhte dan an rêl

Khawzawl bawrhsap Zothanmawia kaihhruaiin April 10, Inrinni khan DC conference hall-ah SP, 2nd IR Battalion, District Village Council Association, YMA Sub-Headquarters aiawhte leh DC office-a officer-te'n district chhunga dan leh thupek kaihhnawih kenkawh dan tur an sawiho.

Meeting chuan, phalna nei loa kuhva rah, ruihhlo leh dan phal loh thil dang Khawzawl district-a lut ṭhinte chu dan a, tihtawp a nih theih nan hmalak an rél a; lirtheiin a paltlang khuaa VC leh YMA/VDP-te chu sorkar thuneitute thawhpui a, dan loa thil tih an hmuh leh hriatte thuneitute hnena hriattir thuai ṭhin turin an chah.

Phalna la hmasa loa sumdawng leh páwl ṭhenkhatin Khawzawl district chhungah kawng thar an lai leh kawng hlui chei ṭhaa dan loa Myanmar aṭanga thil lak luhte phurh nan an hman ṭhin chu titàwp turin hmalak an rél a; a ṭul chuan kawng laihna hmanrua (JCB, motor)-te mansak ṭhin ni se, an ti.

Ruihhlo chi hrang hrangte theihtawp chhuaha do chhunzawm rélin, Khawzawl district-a khua/veng tinah VDP din vek ni se, an ti a; Covid-19 thawh hnihna léng mek chungchangah, district puma hman tur inkaihhruaina (SOP) tihchhuah a, khua/veng tinah tlangau hmanga puanzar ni se, an ti bawk.