Thlawhtheihna lian chi ṭumna atan Lengpui Airport runway a la ṭha tâwk

GAD Aviation Wing-a principal consultant thar Wg. Cdr. J Lalhmingliana chuan, Lengpui Airport runway chu duhthusam ni lo mah se, thlawhtheihna lian ṭumna turin a la ṭhat tâwk thu a sawi a, "Airport hi thuneitute'n an endik dawn a, cheiṭhat ngai an tih loh phei chuan cheiṭhat kher a ṭul lo ang," a ti.

Aviation Principal Consultant hian nimin khan a pisaah thuthar thehdarhtute lêngah sáwmin a titipui a; Lengpui Airport chu thâwk leh khata cheiṭhat thut theih a nih loh thu sawiin, "Sum chu a awm a, mahse, cheiṭha tur hian a process a thui hle. Hna thawh dawn hunah Airport-a thawktute hnathawh hun tur leh thlawhtheihna ṭum theih hun tur hriattir a ngai dawn a, kan la hriattir lo," a ti a; Airport cheiṭhat chungchang chu thuneitute'n an endik hnuah a chian tur thu a sawi.

J Lalhmingliana chuan, tun hnaiah Jet Airways-in Mizorama an service an tihtawp avanga Mizoram mipuiin harsatna an tawh sutkian tumin Governor, Chief Minister, Chief Secretary, MP-te leh political party-te'n an vei a, central sorkara hotute hnenah an thlen tawh ṭhin tih a sawi a, "An nawr nasa. An sawite kha a effective turah kan ngai, mahse, tun thlengin chhanna kan la hmu lo," a ti.

Principal Consultant sawi danin, Mizo­ramah Indigo Airlines service an tum a, a hmunah an rawn endik tawh a, Lengpui Airport runway chu an duhthusam ni lo mah se, an service theih beisei a ni. Chutih rualin, an thlawh ṭan hun tur tihchian a awm lo a, March thla chhung chuan an service hman dawn lo.

Tunah hian Air India service mekin, ni tin thlawhna pakhat a thlâwk ṭhin a, airlines dang an service hmaa thlawhna thlawh belhtir turin thuneitute'n an ngen tawh a, mahse, chhanna mumal a awm rih lo. "Chhanna kan la dawng lo a, kan hrethiam bik lo. Engtikah nge an rawn service ṭantir dawn kan hre lo," a ti a; Tripura erawh chuan Indigo thlawhtir tur thu an dawng tawh tih a sawi.

Chief minister Zoramthanga'n February 21, 2019-a Mizoram Synod hruaitute nena an inkawmnaah, Lengpui Airport runway a ṭhat tâwk tawh loh vangin thlawhtheihna company-te Mizoramah an service ṭhat duh loh phah nia a sawi chu J Lalhmingliana chuan a sawifiah a, "Runway ṭhat loh vang, tih hi a dik tho laiin, a dik chanve deuh a, thlawhna ṭumna tlak a ni lo, tihna a ni lo," a ti.

Aviation Principal Consultant sawi danin, Lengpui Airport chu kum 1998-ah hawn a ni a, a tirah runway pavement chak dan tehna, pavement classification number (PCN)-ah 36 a ni. Runway chu airport dang angin a lûn lo a, rim tak hman a ni lo. Runway tichak turin NEC-in sum a pek hmangin kum 2007-2009 velah runway chu thawm ṭhat a ni.

Run way thawm ṭhat chu a hmaa mi aiin ṭha zawka ngaih ni mah se, PCN zat a thara puanzar (declare) a ni lo a, chuvang chuan PCN zat chu official-ah chuan 36 tho a la ni. Chutih laiin, thlawhna lian, Boeing 737-te chuan PCN 36 aia sang an mamawh thung.

Lengpui Airport runway PCN chu a tak takah 36 aiin a sang zawka ngaih a nih tawh avangin Indigo Airlines chuan PCN chu a thara declare turin Mizoram sorkar thuneitute a ràwn a, sorkar pawhin hma a la mek. Lengpui Airport chu tun dinhmunah thlawhna lian ṭumna tlak a nih leh nih loh zawhna chhangin J Lalhmingliana chuan, "Ṭumna tlak a ni. Mahse, dan a awm a, dan a pawimawh ṭhin. Chu chu safety atan a pawimawh a ni," a ti.

J Lalhmingliana chuan, Lengpui Airport chu runway PCN 36 chiah a la nih avangin, Jet Airways-in thlawhtheihna lian an thlawhtir lai khan thlawhna chu a zân (zãng) zawk theih nan seat full-in passenger an la ngai lo niin a sawi a, "Seat full loin, 85% vel chauh full-in Aizawl bikah an thlâwk ṭhin," a ti a; chu chuan an sumdawnnaa an hlâwkna tur a nghawng tih a sawi.

Wg. Cdr. J Lalhmingliana sawi danin, India rama airport 130 vel zingah Kochin leh Aizawla airport-te chiah chu Airport Authority of India-in an enkawl lo loh awmchhun a ni a, Aizawl chu state sorkar enkawl niin, Kochin airport chu corporation enkawl a ni.